Кустанай үүлдэр

Кустанайн, Майкулийн ба Тройцкийн адуун заводын нэрийн хуудас болсон энэ үүлдрийн адуу 1952 онд  албан ёсоор бүртгэгджээ. Сонгомол казак адууг Дон, Будённый, Орлов Ростопчины ба цэвэр цусны уналгын үүлдрүүдээр сайжруулан гаргаж авсан байна. Эрлийз адууг бэлчээрийн маллагааны сайжруулагдсан нөхцөлд сүрэглэн маллаж, нэмэлт тэжээл тогтмол өгөхөөс гадна шаардлагатай үед саравчинд тусгаарлан малладаг.  Кустанайн үүлдрийн адуу бол галбир байдлаараа намхан бат хөл мөчтэй, дунд зэргийн толгойтой, урт хүзүүтэй, дунд зэргийн мундаатай, цэх шулуун нуруутай, богиновтор хондлойтой (хондлой нь налуу байх явдал олон тохиолддог) бядлаг адуу юм.
Энэ үүлдрийн адууны гол зүс нь зээрд, хээр зүс болно. Кустанай үүлдрийн адуу уналга ачиллаганп илүү тохиромжтой, хурд сайтай адуу.  Дээхэн үедээ цагаан замаар уралдуулахад 2000 метр газрыг 2 минут 14 секунд давхидаг бол Майкулийн адуун заводын Черврнец гэгч азарга 100 км газрыг 4 цаг 1 минут 0,5 секундэд давхиж түүхэнд бичигджээ. Энэ үүлдрийг үндэслэн үүсгэсэн Зевс гэгч азарга сорилтын уед 456 кг зүтгэлтийн хүч гаргасан тухай ч тэмдэглэгдлсэн нь бий.