Сурынхны амжилтын буухиаг хоёр алтаар үргэлжлүүллээ

Унгар улсад  энэ сарын 13-16-ны хооронд болсон олон улсын их наадамд манай сурынхан амжилттай оролцож багаараар хүрэл медалийн эзэд болсон байна. Уламжлалт харвааны төрлөөр олон төрлийн байг харвах наадмын эрэгтэйчүүдээс Монгол улсын гарамгай мэргэн Цэвээний Хүдэрчулуун 111 оноогоор, эмэгтэйчүүдээс Монгол улсын спортын мастер Цогбадрахын Туваанжав 109 оноогоор тус тус алтан медаль хүртэж хамт олноо хошуучилсанд сурынхан баяртай байна. Унгарт болсон энэхүү сурын наадам нь анх удаа зохиогдож байгаа туршилтын наадам гэнэ. Зохион байгуулагчдын зүгээс ямар  нэг асуудал гараагүй тохиолдолд цаашид уламжлал болгон явуулах ажээ.
Монголын Уламжлалт сурын холбоо 2009 онд байгуулагдсан бөгөөд энэ хугацаанд олон бахдам амжилтыг гаргаад байгаа юм. Жил бүр Солонгос улсын Засгийн газраас зохион явуулдаг уламжлалт харвааны  наадамд анх 2008 онд Уламжлалт харвааны холбооны дэд ерөнхийлөгч, спортын мастер, М.Зоригт мөнгө, Монгол улсын мэргэн Ш.Даваахүү, П.Гарамдорж  нар хүрэл  медаль хүртэж байлаа. Тухайн үед 22 орны тамирчид цэц мэргээ сорьсон юм. Ийнхүү тэдний гаргасан жим булган сүүлтэй байж  2009 онд мөн Солонгос улсад болсон олон улсын тэмцээнээс Монгол улсын мэргэн Даваахүү, Норжмаа нар тус тус мөнгөн медаль хүртсэн юм. Үүнээс жилийн дараа Энхтунгалаг мэргэн медалийн буухиаг үргэлжлүүлэн алтаар гоёсон бол 2011 онд Пусанд болсон 32 орны, 300 гаруй төлөөлөгчид оролцсон наадмаас Монгол улсын нар  алт, мөнгө, хүрэл медалийг, эрэгтэйчүүдээс спортын мастер А.Александр алтан медаль хүртсэн байна. Харин өнгөрсөн онд эрэгтэйчүүдээс спортын мастер Батхуяг, эмэгтэйчүүдээс Монгол улсын мэргэн Оюунчимэг нар тус тус алт, багаараа хүрэл медалийг эзэд болж байжээ. Нийтдээ Пусаны наадмаас 5 алт, 4 мөнгө, 3 хүрэл медалийг хүртээд байгаа юм. Харин энэ удаад анх удаа хөгшин Европыг зорьсон сурынхан  маань ганзага дүүрэн эх орондоо өчигдөр иржээ.

П.Ундраа