Урианхай сурын урилга харваа болно

Энэ сарын 31-ны 10 цагт сурын талбай дээр урианхай сурын урилга харваа болох гэнэ. Үндэсний сурын спортын мастер Б.Баярсайхан, урианхай сурын мэргэн, үндэсний спортын мастер Ж.Мягмар, урианхай сурын спортын дэд мастер Б.Энхсайхан нар зохион байгуулж байгаа бөгөөд гурван байр эзлүүлэх юм байна. Одоогоор 40 гаруй харваачид оролцохоор мэдүүлгээ өгөөд байгаа ажээ. Энд тэмдэглэхэд урианхай сурын харваа нь Монголдоо хамгийн том нумыг хэрэглэдэг бөгөөд хамгийн чанартай харвалтыг үзүүлэх үүднээс өрөөтэй сурыг зөвхөн онох бус, оногдсон сур нь цаана байрлах мөр гарган өндөрлөсөн шороон нурууг давж үсэрсэн байх шаардлагатай байдаг ажээ. Урианхай сурын харваа нь наадмаар харвах зуны сур харваа, өвөл цагаан сараар голын мөсөн дээр харвах "Мөсний сур харваа" гэсэн хоёр төрөлтэй. Урианхай сурын харвааг томоохон хэмжээний баяр наадмаар харвадаг бөгөөд нум сумыг шүтэн дээдэлж, сурын харвааны эртний хатуу чанд уламжлалт зан заншлыг мөрдөж ирсэн байна. Мөн эр хүний наадам гэдэг утгаар нь эмэгтэй хүн сур харвахыг өнөөг хүртэл хориглож иржээ. Урианхай сурын өөр нэг онцлог нь баг болж тоглодог. Нэг баг хэдэн ч хvнтэй байж болдог. Багийнхан хамгийн ахмад болоод сайн харвадаг хvнээ магнай дараагийн хvнээ бахлуур, сур баригч гэж нэрлэдэг. Наадаж эхлэхийнхээ өмнө өрсөлдөгч багтаа “Манай баг танайхыг тэдэн сураар илvv хожно” гэж хэлнэ. Тvvнчлэн тийм хугацаанд хожно гэж хугацаа зааж өгдөг. Бас заавал бооцоотой тоглодог байжээ.

П.Ундраа