Сүхбаатарын уяачид чуулна

Сүхбаатар аймгийн “Жавхлант шарга” Морин спорт уяачдын холбооноос жил бүр уламжлал болгон зохион явуулдаг аймгийн “Аварга хүлэг” шалгаруулах дээд гурван насны  /Азарга, Их нас, Соёолон / уралдаан билгийн тооллын усан могой жилийн хаврын тэргүүн сарын шинийн долооны хөх барс өдөр буюу 2-р сарын 17-нд  Баруун-Урт хотноо болсон билээ. Энэхүү уралдааны азарганд 150, их насанд 180, соёолонд 170 гаруй алтан туурт тоосоо өргөж, хурсан олныг цэнгүүлсэн юм. Харин энэ удаад “Жавхлант шарга”-ынхан  доод гурван насны аваргуудаа тодруулах тов гарчээ. "Шаргын уул"-ын бага гурван насны уралдаан зуны эхэн сар буюу 5-р сарын 5-ны өдөр Баруун-Урт хотноо зохион байгуулагдахаар болжээ. Түүнчлэн тус аймгийн уяачид тавдугаар сарын 4-нд чуулан өнгөрсөн оны ажлаа дүгнэн хэлэлцэж, цаашид хийх ажлаа төлөвлөхөөр зэхэж байгаа аж. Тиймдээ ч хаврын ажил ундарсан энэ өдрүүдэд 13 сумдынхаа уяач нартаа урилга илгээх ажлыг “Жавхлант шарга” Морин спорт уяачдын холбооныхон эхлээд байгаа  гэнэ.

А.Мөнх