МУ-ын Манлай уяач Ц.Батсайхан: Миний хязаалан шинэ монгол адуу

-Өмтэй сайхан наадаж байгаа танд баяр хүргэе. Баярын сэтгэгдлээсээ хуваалцахгүй юу?

-Баярлалаа.Танай сэтгүүлээр дамжуулаад Монголынхоо нийт ард түмэндээ баярын мэнд дэвшүүлье.  Төрийнхөө энэ том наадамд морь айрагдуулна гэдэг хүн болгонд тохиодоггүй сайхан аз завшаан юм. Тэр тусмаа баяр наадмын хамгийн эхний өдөр, хамгийн эхний уралдаанд ийм сайхан өмтэй наадсандаа сэтгэл маш өндөр байна.

-Таны хонгор хязаалан гарсан цагаасаа эхлээд тархинд уралдсаар аман хүзүүдлээ. Наадмын өмнөх сорилго сунгаануудад ч сайн байсан дуулдсан?

-Энэ хонгор хязаалан бол миний унаган адуу. Шинэ Монгол адууны төлөөлөл. Эх нь Монгол гүү эцэг нь миний Араб халзан азарга бий. Дааган насандаа улсад арван хэдээр давхиад, Заамарын бүсийн наадамд түрүүлж байсан. Ноднин шүдлэндээ улсад хорин хэдээр давхиад Баянхонгорт түрүүлсэн. Энэ жил төрийн наадамдаа анх удаа торгон жолоогоо өргүүлж байгаа юм.

-Ганц Манлай биш, “Босоо хүлэг”  галын морьд энэ жил өнгөтэй сайхан байна?

-Би 2004 оноос хойш улс бүсийн наадамд наадсан, зургаан жилийн дотор МУ-ын Манлай уяач цолыг хүртлээ. Алтан туурайт тэнгэрийн амьтны хайр ивээл намайг ивээж, өдий зэрэгтэй явуулж байгаад үнэхээр билгэшээдэг. Манай галын хамт олны эвсэг найрсаг хөдөлмөрч зан чанар миний амжилтын салшгүй хэсэг.

-Баярлалаа. Тод магнай торгон жолоогоо өргүүлж яваарай.

"Тод магнай" сэтгүүл дугаар №7