“Юнитра” ХХК-ийн захирал Ж.Довдонбалжир: 35 жилийн өмнө даага уяж аман хүзүүдүүлж байлаа

-АХ-ын 89, Их Монгол улс байгуулагдсаны 804 жилийн ойн баяр наадамдаа соёолон айрагдуулсан танд баяр хүргэе. Баярын сэтгэгдлээсээ хуваалцахгүй юу?
-За баярлалаа. Энэ жилийн наадам үнэхээр сайхан болж өндөрлөлөө. Хэдийгээр гантай байсан ч наадмын өмнө тэнгэр хураа хайрлаж, газар дэлхийн өнгө сэргэсэн. Хурдан морьдын уралдаан ч их сайхан боллоо. Төрийнхөө наадамд соёолон аман хүзүүнд хурдаллаа. Сэтгэл өндөр байнаа.
-Зэгэл соёолон наадмын өмнөх сунгаануудад өнгөтэй байгаа дуулдсан. Ер нь найдлага тавьж байсан биз?
-Бид МУ-ын Тод манлай уяач Д.Онон ахын уяатай нэгдэж уясан. Хүмүүс 461-н гарам л гэдэг. Наадмын өмнөх гурван сунгаанд байнга л цээжинд давхиж байсан.
-Соёолонгийнхоо угшил гарвалыг танилцуулаач?
-Сүхбаатар аймгийн Мөнххаан сумын уугуул Сайханбилэг гэж залуугийн адуу. Би нэг сайхан саарал азаргатай хүн л дээ. Тэгээд саарал азаргандаа нэг сайхан гүү хураалгах гээд бураа Пүрэвжав гэж хүний хүргэн Сайханбилэг гэдэг дүү хүүгээ “нэг сайхан нүүр улайхааргүй гүү явуулаадахаач” гэсэн юм. Тэгсэн надад хээлтэй, сөөнгө даагатай шар хээр гүү явуулсан байсан. Тэр үед дагаж ирсэн сөөнгө даага нь энэ зэгэл соёолон маань байгаа юм. Дааганд нь гүү өшиглөчихөөд доголоод уралдаж чадаагүй. Шүдлэнд нь Төв аймгийн наадамд наймаар ирсэн. Хязааландаа Эрдэнэсант сумын наадамд дөрөвт давхисан.Энэ жил соёолондоо Төв аймагт болсон анхны уралдаанд аман хүзүүдэж, дараа нь бас нэг бооцоот уралдаанд түрүүлсэн. Ер нь энэ жил их хурдан байсан даа. Бараг арваад уралдсан шүү. Одоо бол амраачихсан байгаа.
-Хэнтий рүү наадахаар явж байгаа гэсэн. Үрээгээ авч яваагүй юм уу?
-Түрүү хэлсэн хээлтэй гүү ирсэн гэж. Тэр нь эр унага гарч одоо хязаалан үрээ болчихсон. Хэнтий наадам руу аваад явж байна даа.
-Ингэхэд Довдонбалжир уяачийн хувьд морь сонирхох болсон нь хэнтэй, юутай холбоотой вэ?
-Би анх 2005 онд бураа Пүрэвжав гуайн нөгөө нэг хүргэнээс нь дэлтэй хүрэн морь авсан юм. Тэр хүрэн морийг авахаар явж байхдаа Хэнтий аймагт айлын адуугаар ороод нэг саарал үрээ авсан. Үрээ маань тэр жилээ /шүдлэндээ/ улсад айрагдаад, хязааландаа Хэнтий аймгийн наадамд түрүүлээд, соёолондоо Говь-Шанхад аман хүзүүлсэн. Долоотойд нь өнжөөгөөд энэ жил наймтай азарга улсад хорин хэдээр ирлээ. Энэ бүгдийг оруулбал улс бүсийн наадмаас 4-5 айраг түрүү авчихаад байна. Энд сонин түүх яръя л даа. Одоогоос 35 жилийн өмнө би долдугаар ангийн сурагч байхдаа сумынхаа наадамд даага уяж аман хүзүүдүүлж байсан. Тэрний дараа жил хоёр үрээ уяж уралдуулж байсан. Тэрнээс хойш нэг хэсэг сургууль соёл гээд завсарласан л даа.
-Хэдийгээр адуунд дуртай ч ажил төрөлтэй хүмүүс өдөр тутам ажилд нь оролцох боломжгүй байдаг л даа. Таны морьдын уяаг хэн тааруулдаг вэ?
-Манлай уяач Батчулууны дүү Бат-Эрдэнэ гэдэг залуугаар энэ өвлөөс эхлээд уяулж байгаа. Бат-Эрдэнээс өмнө энэ жил ногоон халзан морь айрагдуулсан  Дашпүрэв гэж залуу гардаж, ерөнхий зөвлөхөөр Онон Тод манлай ажилладаг байсан.
-Үрээний тань уяаны онцлог юу вэ?
-Даага, шүдлэнгээс нь эхлээд уячихсан учраас ерөнхийдөө жаахан хатуу уяатай. Хоногийн олноор уяа нь эвлэдэг адуу байгаа. Хэрвээ та бүхэн харсан бол улсын наадамд хүүхэд нь ташуур хөдөлгөлгүй ирсэн шүү дээ. Бид гарахад нь “эрлийзүүдтэй битгий уралдуулаарай үрчихнэ” гэж хүүхэддээ захисан юм.
-“Юнитра” компани ямар чиглэлээр үйл ажиллагаа явуулдаг вэ?
-Бага оврын тоног төхөөрөмж, багаж хэрэгсэл Япон, Германаас оруулж ирдэг. Хондо мотор цахилгаан үүсгүүр, төрөл бүрийн усны насос гэх мэт.
-Баярлалаа, танд амжилт хүсье.

"Тод магнай" сэтгүүл дугаар №6