"Хүрээ тур" ХХК-ийн захирал Б.Давааням: Мянгадын чонон саарал азарганы удмыг таслаагүйдээ сэтгэлийн хийморьтой явдаг

А.Тэлмэн
2013 оны 2-р сарын 25 -нд

-Төрийнхөө их баяр наадамд их морь айрагдуулсан танд баяр хүргэе. Наадмынхаа сэтгэгдлээс манай уншигчидтай хуваалцахгүй юу?
-Баярлалаа. Юуны өмнө “Тод магнай” сэтгүүлийг уншин суугаа Монголынхоо нийт  ард түмэндээ энэ өдрийн мэнд хүргэе. Дэлгэр Монголын наадам дэнж хотойтол сайхан боллоо. Улсын их баяр наадамд хар халзан морь маань тавд хурдалж, гурван жилд нэг удаа тохиодог морины их олимп “Их хурд”-д дөрвөөр давхиж амжилтаа ахиуллаа. Үнэхээр их баяртай байна. Миний нагац ах Уртнасан гэж моринд их дуртай хүн байсан. Ах маань Мянгадын саарал азарганы угшлын адууг уяж хурдлуулдаг аймгийн наадмаас олон айраг түрүү хүртсэн хүн. Тэр хүн маань бурхан болоод арав гаруй жил болж байгаа ч ахынхаа хүслийг биелүүлж төрийн наадмаас айраг амсан Мянгадын Чонон саарал азарганы удмыг таслаагүйд сэтгэлийн хийморьтой явдаг юмаа ах нь. Ахынхаа удмыг тасалж, унаганых нь зэлийг хураасангүй. Үүгээрээ их бахархаж явдаг даа.
-Хэдийнээс хурдан морь сонирхон уяж байгаа вэ? Өмнө нь ямар ямар амжилт гаргаж байсан бол?
-2003 оноос эхлэн хурдан морь уяж сойж байна даа. Өмнө нь улсад арав дотор 3-4 удаа дахиулж байсан.  Төрийн наадамд их морь айрагдуулна гэдэг уяач хүний хувьд хатуухан даваа л даа.
-Халзан морь наадмын өмнөх сунгаануудад яаж давхиж байсан бэ?
-Гайгүй сайхан давхиж байсан болохоор  найдлага тавин хүлээж байсан маань талаар болсонгүй. Бид МУ-ын Тод манлай уяач Д.Онон гуайнхтай хамт 461-н гарам дээр морьдоо уяж сунгаж байсан. Наадмын өнгө тодорхойлдог сунгаан дээр долоо, наймаар давхиад байсан болохоор битүүхэн горьдлого тавьж байсан. Догдлоод зурагтаар ч харж чаддаггүй дэмий л сонсоод холхиж явтал орчих шиг боллоо гэхээр нь гүйсэн дээ.
-Мориныхоо удам угшлын талаар  танилцуулаач?
-Сэлэнгийн Баруунхараад амьдарч байгаа  Алтантулга гэдэг залуугийн унаган адуу юм байгаа юм. Угшлыг нь хөөвөл МУ-ын Алдарт уяач Б.Содномцогийн хар азарганы төлийн төл. Би дааганд нь авсан юм. Энэ жил найман настай адуу. Бага насандаа сумын наадамд дөрөв түрүүлж, тав айрагдаж байсан хурдан буян. Томоохон наадмуудад бол уралдаж байгаагүй ээ.
-Ингэхэд халзан морины уяаг хэн тааруулдаг вэ?
-Төв аймгийн Бүрэн сумын харьяат Доржпүрэвийн Дашпүрэв гэдэг залуу уядаг. Энэ жил төрийн наадамд шүдлэн, хязаалан, их насны  гурван адуутай ирсэн. Шүдлэн маань 30 гарч давхисан бол хязаалан маань 50 гараад давхисан.
-Бүсийн наадмууд залгаж байгаа. Хаашаа явахаар төлөвлөж байгаа вэ?
-Энэ жилийн хамгийн том хоёр наадамд хоёуланд нь айрагдчихлаа. Одоо боллоо. Хурдан сайхан буянгаа гамнаж уралдана. Одоо амраачихсан байгаа. Наадмын дараа намар гэдэг. Намрын ажил, хадлан тэжээлдээ анхаарал хандуулах л үлдлээ.
-Баярлалаа. Танд амжилт хүсье.
-Морины босоо цагаан хийморь өнөд өөдөө байх болтугай. Ийм сайхан хурдан буянаа хайрласан Баруунхараачууддаа баярлалаа. Аз жаргал эрүүл энхийг хүсье.

"Тод магнай" сэтгүүл дугаар №6

0 Сэтгэгдэл

ХХЗХ-ны журмын дагуу зүй зохисгүй зарим үг, хэллэгийг хязгаарласан тул ТА сэтгэгдэл бичихдээ хууль зүйн болон ёс суртахууны хэм хэмжээг хүндэтгэнэ үү. Хэм хэмжээг зөрчсөн сэтгэгдэлийг админ устгах эрхтэй.

    Сэтгэгдэл бичигдээгүй байна