Бандгаан бор

Моринд хайртай Монгол түмэндээ Бандгаа нэрээр алдаршсан “Дорнын унага” галын ахлагч,  МУ-ын Манлай уяач С.Ганхуяг төрийнхөө баяр наадамд өмтэй сайхан наадаж их насны морь айрагдууллаа. Түүний гаргасан амжилт нь МУ-ын Тод манлай уяач цолны болзолыг хэдийнэ хангасан бөгөөд энэ жил хурдан морины түүхэн дэх дээд цолтны тоо нэгээр нэмэгдэнэ бизээ.
Сумынхаа наадам 4-5 удаа түрүүлж, айрагдсан,  давхил сайтай нэгэн хүлгийг Бандгаа уяач  битүүхэндээ шинжиж, бодолдоо тээж явсан бөгөөд 2009 оны намар Дорнод аймгийн Хөлөнбуйр сумын Мөнхбат гэдэг залуугаас үнэ тохирон авч байсан нь өнөө жил төрийнхөө наадамд айрагдаад буй бор морь билээ.Сайн хүлэг эзнээ хайна гэдэг шиг сайн уяач хүлгээ хайж олж байгаа нь энэ гэлтэй. Бор морь цэвэр монгол адуу бөгөөд  эцэг нь мөн л Сүхбаатар аймгийн Түмэнцогт сумын хурдан буян. Өөрөөр хэлбэл Сүхбаатар нутгийн монгол адуу төрийнхөө наадамд айрагдаад байгаа нь энэ. Шинэ эзэндээ есөн настайдаа ирсэн бор морь өнгөрсөн хавар болсон “Дүнжингаравын хурд-2010 ” хаврын бүсийн уралдаанд түрүүлж хурдан ажнай гэдгээ батлан харуулсаныг морь сонирхогчид маань санаж байгаа байх.  “Бор морь цэвэр монгол адуу болохоор жаахан хатуу, хол уяатай юм” хэмээн уяач нь хуучилсан.

"Тод магнай" сэтгүүл дугаар №6