М.Эрхэмбаяр: Морь айрагдах торгон агшныг үгээр илэрхийлэх хэцүү

-АХ-ын 89 , Их Монгол улс байгуулагдсаны 804-н жилийн ойн төрийнхөө баяр наадамд их морь айрагдууллаа. Сэтгэгдлээсээ хуваалцаач?
-Монгол төрийнхөө наадамд их насны морь айрагдуулна гэдэг бол тэр болгон аавын хүүд олдоод байхгүй ховорхон аз завшаан. Энэ нэр хүндтэй, ховорхон аз ахад нь тохиосонд үнэхээр их баярлаж, бахархаж байна.
-Хэзээнээс уяач хэмээн нэрлэгдэх болсон бэ?
-Сүхбаатар гаралтай зээрд морио МУ-ын Тод манлай уяач Г.Сандуйжав,  дотны найз  түмнийхээ дунд Гоё халиун нэрээр алдаршсан хурдан хүлгийн эзэн МУ-ын Алдарт уяач Энхтайван хоёроор уяулан  улсынхаа наадамд 9-өөр хурдлуулсан,  2004 оноос л хурдан хүлгийн тоосонд орж, уяач хэмээн нэрлэгдэх болсон доо.
-Тэгвэл томоохон наадмаас анхны айраг, түрүү хүртсэн нь хэзээ вэ?
-Энэ жил анхны айргаа хүртэж байнаа. Зургаан жил гэдэг бол богино хугацаа биш шүү. Гэхдээ зарим уяачид арав, хорин жилийн дараа улсынхаа наадмаас айраг авч байсан тохиолдол байдаг юм билээ. Миний сайных биш л дээ.Энэ амжилтанд хүрэхэд “Гоё халиун ” галынхан, тэр дундаа МУ-ын Алдарт уяач Т.Энхтайваны минь хөдөлмөр зүтгэл ихээхэн нөлөөлсөн. Энэ дашрамд тусалж, дэмжиж, сайхан нөхөрлөдөг бүх хүмүүстээ баярласнаа илэрхийлэх нь зүйтэй болов уу. Морь айрагдах тэр торгон агшныг үгээр илэрхийлэхэд үнэхээр хэцүү байхаа. Ямар ч байсан өөрийн эрхгүй самсаа шархирч байснаа санадаг даа.( инээв )
-Сая айрагддаг хонгор морь тань дээр хэдтэй ирсэн юм бэ? Өмнө нь ямар амжилт үзүүлж байсан юм бол?
-Т.Энхтайван маань надаас өмнө шинжиж мэдээд “Хэнтийд нэг сайхан морь байна, тэрийг авчихвал зүгээр байх ” гэсэн  санал тавьсан.Найзынхаа зөвлөсөн ёсоор л 2007 онд 10 настайд нь авсан юм. Надад ирэхээсээ өмнө сумынхаа наадамд 4 удаа айрагдсан хүлэг байсан  даа.
-Өөр ер нь хаанаас адуу авсан бэ?
-За ах нь адуу нэг их цуглуулаагүй ээ. Цөөн хэдэн тооны адуутай. Зарим нь бэлгэнд ирсэн, заримыг нь худалдаж авсан. Сүүлийн үед Монгол адуугаа сайжруулъя гэсэн бодолтойгоор Араб, Англи адуунууд авч цус сэлбэж байгаа.
-Ярилцсанд баярлалаа.Таныг монгол хүлгийн босоо цагаан хийморь ивээх болтугай.
-За баярлалаа. Монгол түмэн минь эрүүл энх, ажил төрөл, амьдрал ахуй нь өөдрөг сайхан байх болтугай.

"Тод магнай" сэтгүүл дугаар №6