Өврийн хангайд данстай ажнай төрийн наадамд айрагдсан нь

АХ-ын 91 жилийн ойн баяр наадмын хязаалан насанд 325 хязаалан бүртгүүлснээс 304 нь мордсон юм. Эндээс Өвөрхангай аймгийн Баян-Өндөр сумын харьяат Даваадоржийн Нямлхагвын хар хязаалан 26 минут 34 секунд 76 долийн хугацаанд амжилттай хурдалдаж, төрийн наадмын хишиг хүртлээ. Сүхбаатар, Дорноговийн угшилтай хар азарга Өмнийн говь тэр дундаа Цогтцэцийн араас нийт 600 гаруй км замыг туулан ийнхүү улсынхаа наадамд тоосоо өргүүлж, унасан хүүхэд, уясан эзнээ баясгасан билээ. Төрийн наадамд анх удаа уралдаж айрагдсан битүү хязаалангийн ахын гаргасан амжилт Нямлхагвад итгэл төрүүлж, Ч. Алтансүх найзтайгаа зөвлөлдөж байгаад улсын наадмын өндөр довд хүч үзсэн нь энэ аж. Алтансүх бол удам дагасан уяач. Аймгийн Алдарт уяач цолтой түүний аав Дундговь аймгийн Луус сумын уугуул хүн. Мөн л аймгийн Алдарт уяач. Хашир уяач улсын нийслэл зорих  хүүдээ “төрийн наадам том доо. Хэн хүссэн нь уралдчихдаг юм биш. Гучин айраг түрүүг нь оноотсон том хүмүүс байдаг юм шүү дээ. Хүүгийн минь аз хийморь мэдэж дээ” хэмээсээр үджээ. Ийнхүү унасан хүүхэд, уяач, морь гурвын аз од гийж айрагдав. Нямлхагва битүү үрээгээ Алтансүх найздаа уяулахаар анх авчрахад аав хүү алдартнуудын нүдэнд толгой, дөрвөн туурай, ууц  содон туссан гэнэ лээ. Ийнхүү хурдан адууны шинжийг цогцлоосон Нямлхагвын унаган адуу болох хар хязаалангийн ах ч хурдан ажнай байдаг юм билээ. Өвөрхангайн Бүрд, Төв аймгийн Эрдэнэсант, Чойрын Баянталын бүсийн наадмын түрүү магнай болсон хурдан буянгийн амжилт дээр дурдсанаар улсын наадмыг зорих шалтгаан болжээ.