Тод манлайн хүү Алдарт боллоо

Төв аймгийн МСУХ-ны тэргүүлэгчдийн хурлын шийдвэрээр доорх нэр бүхий уяачдад аймгийн Алдарт уяач цолыг олгохоор шийдвэрлэж, Засаг дарга нь батламжилжээ.
1.Баян-Өнжүүл сумын уяач Хишигжаргалын Нармандах /Өнгөрсөн жил аймгийнхаа наадамд шүдлэн үрээ айрагдуулсан.
2. Алтанбулаг сумын уяач Должинсүрэнгийн Баатар
3. Баянцагаан сумын уяач Даваахүүгийн Баянбат /Тод манлай уяач Д.Даваахүүгийн  хүү тэрээр 2012 онд улсын наадамд хонгор хязаалангаа аман хүзүүдүүлж, төвийн бүсэд түрүүлгэсэн билээ/
4. Борнуур сумын уяач Мөнхтөрийн Сайнзаяа /Хурдан цагаан азаргатай Борнуурын Заяа уяач. Цагаан азарга нь “Дүнжингаравын хурд-2012” хаврын бүсийн уралдаанд наймалж, Өмнөговийн бүсийн уралдаанд 11-ээр хурдалсан /
5. Жаргалант сумын уяач Чойбудраагийн Пүрэв /Өнгөрсөн жил Нийслэлийн хурдад халтар азарга айрагдуулж байсан. 1997 онд Эрдэнэтийн овооны их тахилга хангайн бүсийн даншигт алаг даага аман хүзүүдүүлж байсан/
6. Баянцагаан сумын уяач Шийрэвийн Төмөрхуяг /”Соёмбот хүлэг” галын М.Энхсайхан, М.Энхбат, О.Тагарваа нарын морийг уядаг. Энхсайханы шарга морийг бүсийн наадамд хоёр айрагдуулаад байгаа. Мөн улсын наадамд цавьдар хязаалан айрагдуулж, Өмнөговийн хаврын бүсийн наадмаас айраг хүртсэн хийморилог эрхэм/
7. Батсүмбэр сумын уяач Түмэннасангийн Батхишиг /1994 онд хээр хязаалан улсад айрагдуулж, хойтон жил нь түрүүлгэж байсан/
8. Сэргэлэн сумын уяач Самбуугийн Баярсайхан /Хурдан зээрд үрээгээ Төв аймгийн наадамд гурван жил завсаргүй айрагдуулсан/
9. Сэргэлэн сумын уяач Пагмадуламын Сүрэнжав. Тэрээр Б.Наранхүүгийн Монгол хээр азарганы уяа сойлгыг тааруулдаг билээ.
Сар шинийн босгон дээр амжилтаа үнэлүүлсэн шинэхэн цолтнуудадаа баяр хүргэн, уясан хүлэг тань өнө мөнх тод магнай торгон жолоогоо өргүүлж явахыг хүсэн ерөөе.
                                                                                                                             А.Мөнх-Эрдэнэ