МЭНДЧИЛГЭЭ

Эрхэм хүндэт азай буурлууд, энхрий бяцхан үрс, хүүхэд залуучууд, Өмнийн цэнхэр говь нутгийн хөдөлмөрч ард иргэд та бүхэндээ энэ өдрийн мэндийг хүргэе.

Та бүхэндээ 17-р жарны “Тийн ялагч” хэмээх Усан Могой жилийн амар амгаланг эрэхийн ялдамд элгээрээ энх амгалан, төрлөөрөө түвшин амгалан, ажил төрөл тань өөдрөг байхын ерөөл дэвшүүлж мэндчилье.    
Түүхийн шаргал хуудас ээлжлэн эргэсээр удахгүй Могой жилтэйгээ бид золгох гэж байна. Бас Өмнөговьчууд бидний хамтын түүх болсон Луу жил улиран одож байна. Өнгөрсөн Луу жилд тохиосон ололт амжилт бүхэн говь нутгийн ард олон та бүхний бүтээж, хойч үедээ өвлүүлэн үлдээх үнэт зүйлс билээ. Өмнөговь аймгийн хувьд өнгөрч буй жилд цаг агаарын тааламжтай нөхцөл, малчдын хүч хөдөлмөрийн шимээр мал сүрэн таван төрөл дээрээ өсч 1,4 сая толгой мал тоолуулсан амжилтаар шинэ оноо угтаж байна. Мөн говь нутгийн бахархал болсон тэмээн сүргээ 97 мянгад хүргэж Монгол улсдаа тэргүүн байр эзэллээ. Улиран одож буй Усан луу жилд Өмнөговьчууд аймаг, орон нутгийнхаа нэрийг сайнаар гаргаж олон олон шинэ бүтээн байгуулалтууд өрнөлөө. Тухайлбал Өмнөговь аймаг маань төвийн эрчим хүчний системд холбогдож ард иргэдийг цахилгааны бэрхшээлээс гаргаж, Улаанбаатар хот болон Гурвантэс сум хүрэх засмал замын эхлэл тавьсан, Монгол улсын түүхэнд орон нутгийн хөрөнгө оруулалтаар 175 хүүхдийн цэцэрлэг барьсан анхны аймаг болсон, эмч багш нарыг орон сууцаар хангасан, ард иргэддээ “Нутгийн хишиг” хөтөлбөрийн 500 мянган төгрөгийг олгож дууссан, УИХ-ын ээлжит сонгуулийн үр дүнгээр Өмнөговь аймгаас хоёр сайд төрөн гарсан гээд олон олон үйл явдлууд тохиож говь нутгийн түүхэнд олон шинэ хуудсыг нэмсэн билээ. Луу жилд Бидний эхлүүлсэн ажлууд ирэх дөрвөн жилдээ үргэлжлэн эрүүл мэнд, боловсрол, дэд бүтэц, байгаль орчин, хөдөө аж ахуй, эрчим хүч зэрэг олон салбарт томоохон зорилтууд бодит ажил болон үргэлжлэх болно.         
Мэргэд чуулж оюуны тэнгэрлэг хүч чадал оршсон, бүтээн босгох, хөгжин дэвжихийн эрмэлзлэл хүн бүхний сэтгэлийн галыг бадраасан, аз жаргалтай үйлс ундарсан шинэ Өмнөговь болж хөгжин цэцэглэнэ гэдэгт бид итгэлтэй байна.  
            Удахгүй гарах гэж буй Усан могой жил Өмнөговьчуудын маань амьдралд өөдрөг өнгө нэмсэн жил байна гэдэгт итгэж байна. Байгаль дэлхий ээлээ хайрлаж хур бороогоо хайрлаж малчид, хөдөлмөрчдийн минь буян заяаг түшинэ гэж итгэж байна.   
Өнгөрсөн дөрвөн жилд бидний хийсэн бүтээснийг үнэлэн орон нутгийн ард иргэдийн итгэлийг даалгах, говь нутгаа хөгжүүлэх эрхэм хүндтэй үүргийг дахин оноосонд бид талархалтай байна. Хэзээнээс ухаалаг мэргэнээрээ алдартай, уужим тэнүүн говийн ард иргэд та бүхэн маань эхлүүлсэн хөгжил цэцэглэлт бүтээн байгуулалтандаа идэвхитэй оролцож, үр хүүхэд хойч ирээдүйнхээ төлөө хамтдаа зүтгэхийг уриалж байна.
Ирж буй Усан могой жилдээ говьчууд бид хамтдаа нутгийнхаа хөгжлийн төлөө урагш тэмүүлж зүтгэе. Өмнөговьчууд саар бүхнээсээ ангижирч сайн бүхэн рүү тэмүүлсэн жил болох болтугай.Та бүхэн сар шинэдээ сайхан шинэлж, ерөөл буяны тэнгэртээ цацал сүүгээ өргөн, ертөнцийн хамгийн эрхэм дээд цэнгэлийг эдлэн, айл хотол, ахан дүүсээрээ элбэг баян жарган суухын билиг орших болтугай. 
Сар шинэдээ сайхан шинэлээрэй.  

Өмнөговь аймгийн Засаг дарга Б.Бадраа