Дорнод аймгийн МСУХ-ны уралдаануудын тов гарлаа

Дорнод аймгийн МСУХ-ны тэргүүлэгчдийн 2013  оны анхдугаар хурлын шийдвэрээр могой жилд болох хурдан морины уралдаануудын хуваарийг  гаргажээ. Анх удаа аймгийнхаа нийт 14 сумыг бүсчилэн зохион байгуулж,  бүсийн уралдааныг  цаг агаарын байдлаас шалтгаалан билгийн тооллын хаврын тэргүүн сарын шинийн 15-нд буюу 2013 оны 02 сарын 25-ны өдөр хойд сумдын бүсийн уралдааныг Сэргэлэн сумын төвд / Сэргэлэн, Цагаановоо, Баянуул, Баяндун, Дашбалбар, Чулуунхороот, Гурванзагал сумд хамрагдана / харин урд сумдын бүсийн уралдааныг Хэрлэн сумын төвд / Хэрлэн, Чойбалсан, Халхгол, Матад, Булган, Хөлөнбуйр, Баянтүмэн сум хамрагдана / тус тус зохиогдоно.  Холбооныхоо  нэрэмжит дээд гурван насны уламжлалт хаврын уралдааныг 3-р сарын 18-ны өдөр аймгийнхаа төв дээр явуулах бөгөөд энэ үеэр хос морьтон тэмцээн болно. Цагаан-Овоо сумын МСУХ-ны уламжлалт доод гурван насны уралдааныг 4-р сарын 5-ны өдөр зохион байгуулах бөгөөд энэ уралдаанд Монгол улсын Манлай уяач С.Төмөр-Очирын Шуурган зээрд, аймгийн Алдарт уяач Б.Цэндбаатарын Туган хул, хурандаа С.Нэргүйбаатарын саарал зэрэг азарганууд бага насандаа түрүүлж байсан Дорнодын уяачдын хүсэн хүлээдэг энэхүү уралдаанд түрүүлж айрагдсан морьдын уяачдын амжилтыг аймгийн алдарт уяачийн цол зэрэгт оруулан тооцохоор болжээ. Эдгээр уралдааны дараа зуны тэргүүн сарын шинийн гурванд буюу 5-р сарын 13-нд уламжлалт Баянтүмэн хануулын тахилгын наадам болж, залгаад сумдын болон аймгийн баяр наадам, мөн Булган сумын түүхт 90 жилийн наадам тохионо. Үүний дараа ММСУХ-ны зохион байгуулагддаг  “Их хурд-6” шигшмэл морьдын уралдаанд, МУ-ын Засгийн газрын шийдвэрээр Дорноговь аймагт зохион байгуулагдах “Зүүн бүсийн хурд-2013” наадамд, Дэлхийн адууны баяр Гиннесийн номд 3000 монгол морины уралдааныг бүртгүүлэх зэрэг томоохон арга хэмжээнүүдэд  аймгийнхаа  уяачид, унаач хүүхдүүд, хурдан хурц морьдоо хамруулах төлөвлөгөөгөө хэлэлцлээ. Мөн аймгийн баяр наадамд хурдан хүлэг морьдоо түрүүлж айрагдуулсан Хэрлэн сумын харьяат Содномдаржаагийн Ганбаатар, Бизьяагийн Доржсүрэн, Булган сумын харьяат Дашдоржийн Ядамсүрэн нарын уяачдад “аймгийн Алдарт уяач” цол олгуулахаар Дорнод аймгийн Засаг Даргын үүрэг гүйцэтгэгчид өргөн мэдүүлэхээр шийдвэрлэжээ.

Б.Батсайхан