Ц.Ганхүүгийн хонгор халзан

Адуунд дуртай эр болгоны хүсэл төрийн наадмын хишиг хүртэн төв цэнгэлдэхэд түмэн олныхоо өмнө  цоллуулан зогсох тэр л мөч байдаг гээд хэлчихвэл нэг их хол зөрөхгүй бизээ. Дуу хуурын өлгий Дундговь нутгийн хүү, аймгийн морин спорт уяачдын холбооны тэргүүн Ц.Ганхүү тэр хүслээ биелүүлэн АХ-ын 91 жилийн ойн баяр наадамд хонгор халзан даагаа аман хүзүүнд хурдлууллаа. Төрийн наадмын анхны айраг амсуулсан хонгор халзан дааганы  угшил гарвалын тухайд гэвэл хоёр жилийн өмнө  Ц.Ганхүү эх хонгор гүүг нь /Сүхбаатар аймгийн харьяат Мөнхсүрэнгийн/ Дорнод аймгийн Цагаан-Уул сумын уугуул Батсайханыд хүргэн өгч хээр азарганд нь хураалгасан аж. Ийнхүү хоёр талын хурдны удамтай хонгор халзан даага  он гарсаар гурван ч жижиг уралдаанд тоосоо өргөн шандас шалгасан  бөгөөд уяаг нь МУ-ын Алдарт уяач Дуламын Дашдэлэгийн ач хүү Лхагважав тааруулжээ.