Дорнод аймгийнхан шилдгүүдээ тодрууллаа

Дорнод аймгийн МСУХ-ныхон энэ сарын 24-ны 17 цагт  “East palace”-т шинэ жилийн цэнгүүнээ эхлүүлсэн юм.
..Энэхэн замбативийн эзэн нь болох гэж эрх хүн төрдөг юм
Эргэх дэлхийгээ хайрлах гэж эр хүн төрдөг юм
Эх орондоо тулах багана, тулгуур болох гэж эр хүн төрдөг юм
Эрхт төрдөө түшээ болох гэж эрх хүн төрдөг юм... Тиймээ тусгаар тогтнол, түүх соёлоо туурайт хүлгийнхээ зоон дээр тунхагласан Чингис хааныхаа гал голомтыг бадрааж яваа хийморилог уяачид ийнхүү ололт амжилтаа дүгнэн баярлацгаалаа. Цэнгүүний нээлтийг Монгол улсын Их хурлын гишүүн, аймгийн МСУХ-ны тэргүүн Х.Болорчулуун нээсэн юм. Энэ онд тус аймгийн МСУХ нь 15 жилийн ойн баяраа тэмдэглэн өнгөрүүлсэн билээ. Ойн арга хэмжээний хүрээнд дээд гурван насны өндөр бай шагналтай хурдан морины уралдааныг зохион байгуулж, МҮОНТ-тэй хамтран сумдын залуу уяачдыг оролцуулсан “Адуучин” нэвтрүүлгийг хийсэн аж. Мөн өнгөрсөн хавар аймгийн МСУХ-ны дөрөвдүгээр бага хурлыг зохион байгуулж бүтцийн шинэчлэл хийн, шинэ тэргүүнээр нь “Дорнод гурил” ХХК-ны захирал Х.Болорчулуун сонгогдон ажиллах болсон юм. 2012 онд Дорнодын уяачид улс, бүсийн наадмуудад одтой наадан, буухиагаа үргэлжлүүлсэн амжилтаа энэ үдэш онцолцгоолоо. ММСУХ-ны шилдэг 9 уяачийн дөрөвдүгээрт  Цагаан-Овоо сумын харьяат аймгийн Алдарт уяач Т.Батзориг эрэмбэлэгдсэн билээ. 1995 онд сумынхаа наадамд өөрийн унаган адуугаа айрагдуулснаар амжилтын гараагаа эхэлж байсан тэрээр 2012 он гарсаар Ардын хувьсгалын 91 жилийн ойн баяр наадамд шүдлэн түрүүлгэж, эрлийз дээд насны ангилалд азарга аман хүзүүдүүлсэн юм. Мөн Өмнөговийн бүсийн уралдаанд азарга түрүүлгэж, соёолон дөрөвт, азарга тавд хурдлуулан Төвийн бүсийн уралдаанд азарга аман хүзүүдүүлэн энэхүү амжилтаараа ийнхүү Монгол улсын шилдэг уяач нарын нэгээр шалгарсан юм.  Энэ онд одтой наадсан бас нэг эрхэм бол Матад сумын харьяат, аймгийн Алдарт уяач Б.Цэндбаатар байлаа. Эдний уясан хурдан хүлгүүд Монгол төрийн болон бүсийн наадмуудаас нийтдээ 4 түрүү, 8 айраг хүртсэн амжилтаараа 2013 онтой золгож байна. Түүнчлэн аймгийн МСУХ-ны тэргүүлэгч “Чандмань тал” ХХК-ны захирал Ж.Энхболдын хүрэн үрээ АХ-ын 91 жилийн ойн баяр наадамд түрүүлж, Халхгол сумын харьяат аймгийн Алдарт уяач А.Цогоогийн унаган хээр азарга айргийн тавд хурдалжээ. Хөлөнбуйр сумын Мөнхбатын унаган адуу бор морийг МУ-ын Тод манлай уяач С.Ганхуяг уяж улсын наадамд гурав дахь жилдээ айрагдан шинэ амжилтын түүхийг бичсэн байна. Бас аймгийн МСУХ-ны нарийн бичгийн дарга Б.Батсайхан ажил үйлсээрээ шалгарч Турк улсын Станбул хотод болсон Азийн морин уралдааны холбооны 34-р бага хуралд төлөөлөгчөөр оролцжээ.  Айраг түрүү хүртэнэ гэдэг уясан эзэн, унасан хүүхэд, хурдан морь гурвын аз хиймортой холбоотой. Тиймдээ ч энэ үдэш одтой наадсан унаач багачуудыг нэрлэж, шагналын хур буулгасан юм. Унаач хүүхдүүдээс Матад сумын Т.Баярхүү, Цагаан-Овоо сумын Б.Баттулга нар шалгарсан. Тус холбооныхон энэ жил унаач хүүхдүүдээ олон улсын Найрамдал зусланд амрах эрхийн бичгээр шагнаж, урамшуулсан нь бяцхан унаачдад урам зориг нэмсэн юм. Энэ мэт ололт амжилтаараа дүүрэн шинэ оныг угтаж байгаа Дорнодчууд шилгүүдээ ийнхүү нэрлэж байна. Үүнд:
1. Оны шилдэг уяачаар: Дорнод аймгийн Матад сумын уугуул, сумын Алдарт уяач “Буман хурд” гал уяаны залуу уяач Маруушийн Мөнхсайхан шалгарсан юм. Тэрээр Дорнод аймагт зохиогдсон Матад сумын баяр наадмаас 3 түрүү, 4 айраг, АХ-ын 91, аймаг байгуулагдсаны 81 жилийн түүхт ойгоор 1 түрүү, нэг айраг хүртжээ. Мөн Сүхбаатар аймгийн Эрдэнэцагаан суманд болсон Хатагин гуравдугаар хошууны 2-р их наадмаас хоёр айраг хүртсэн амжилтаараа  “мэргэжил нэгт нөхдөө” манлайллаа.
2. Оны шилдэг ивээн тэтгэгч байгууллага:  Д.Цогтгэрэл захиралтай “Буман олз” ХХК
3. Оны шилдэг ивээн тэтгэгч иргэн: аймгийн МСУХ-ны тэргүүлэгч, Халхгол сумын “Халхын Тован” МСУХ-ны тэргүүн А.Хүрэлбаатар
4. Оны шилдэг салбар холбоо: Халхгол сумын “Халхын Тован” МСУХ
5. Оны шилдэг азарга: Дорнод аймгийн Халхгол сумын харьяат Баатарын Мягмардоржийн Бор азарга /Уяачдын холбооны 15 жилийн ойн нэрэмжит уралдаанд айрагдаж, АХ-ын 91, аймаг байгуулагдсаны 81 жилийн ойн баяр наадмаар түрүүлсэн/
6. Оны шилдэг их нас: Дорнод аймгийн Матад сумын харьяат Баатарын Гантудгын хонгор морь / Уяачдын холбооны 15 жилийн ойн нэрэмжит уралдаанд айрагдаж, АХ-ын 91, аймаг байгуулагдсаны 81 жилийн ойн баяр наадмаар түрүүлсэн/ шалгарлаа.

П.Ундраа

Фотог Тэмка