Шилдэг унаач болж ээжийгээ баярлууллаа

2012 оны чансаатай унаачдын нэгдүгээрт “Од” гал уяаны хурдан морь унаач Гансүхийн Сүхбат 32 оноогоор тэргүүлсэн билээ. Улс, бүсийн наадмаас 2 түрүү, 8 айраг хүртсэн унаач хүүтэй баярын сэтгэгдлээс нь хуваалцсанаа хүргэж байна.
-Шилдэг унаач болсон дүүдээ баяр хүргэе. Баярын сэтгэгдлээс хуваалцаач?
-Баярлалаа.“Тод магнай” сайтынхаа ах эгч нар болон намайг таньдаг бүх хүмүүст шинэ жилийн баярын мэндийг хүргэе. Уяачдын баярын өмнөх өдөр урилгаа аваад, ээжтэйгээ оролцохоор болсон. Энэ шинэ жилээр ээжийгээ баярлуулсан болохоор гоё байнаа. Бид хамтдаа тайзан дээр гарч шагналаа авч, зургаа авахуулж, баярын ширээний ард хамт суугаад л. Дараа жил ч гэсэн олон айраг түрүүтэй болоод дахиад ээжийгээ баярлуулнаа.
-Хэдэн настай вэ? Хурдан морь унаад хэдэн жил болж байна.
-Одоо би найман настай. Намайг таван настайд аав маань морь унахыг зааж өгч байлаа. Түүнээс хойш хурдан морь унаж байна. Энэ хугацаанд олон айраг түрүү авсандаа баярладаг шүү.
-Аав нь морь уядаг уу?
-Үгүй ээ. Морь уядаггүй л дээ, гэхдээ мал малладаг. Миний аавыг Гансүх, ээжийг Улаанаа гэдэг. Одоо Партизанд амьдарцгаадаг юм.
-Хэзээнээс “Од” галын унаач болсон юм бэ? 
-Манай ах Сэргэлэнбаатар Монгол улсын Манлай уяач Б.Бат-Өлзий ахын морийг унадаг байсан юм. Одоо 15 нас хүрээд хасагдаад, туслах уяач болчихсон. Би ахыгаа дагаж яваад л хурдан морины унаач болсон юм. Ах маань анхны “Их хурд”-аар ногоон морийг унаж зургаалуулж байсан.
-Аль сургуульд сурдаг вэ? Чөлөө их авч байна уу?
-Би Өлзийт хорооллын 59-р сургуулийн Цэцэгдэлгэр багштай хоёрдугаар ангид сурдаг. Хааяа уралдаан гээд чөлөө авах үе гардаг ч олон бишээ.
-Танай ангид унаач хүүхдүүд байна уу?
-Сайн мэдэхгүй байнаа. Гэхдээ нас бага гэлтгүй бидний дунд хааяа морины тухай ярина өрнөнө гээч. Энэ нь надад сонирхолтой санагддаг.
-Том болоод ямар мэргэжилтэй болох вэ?
-Би чинь  дөнгөж л хоёрдугаар ангид сурдаг. Тийм болохоор одоохондоо мэргэжлээ сонгоогүй ээ.  Өдөр бүр л өөр өөр мэргэжилтэй болмоор байдаг. Нэг өдөр уяач болмоор ч юм шиг, маргааш нь  босс болбол бас гоё санагдаад байдаг юмаа.
-Хурдан морь унах гоё уу?
-Тэгэлгүй, үнэхээр гоё шүү. Тэр тусмаа түрүүлээд ирэх. Бариа ойртоод л, үзэж байгаа хүмүүс уухайлаад л, бөөн баяр болсон уяач ах баяр хүргээд л гоё шүү. Тиймдээ ч би баяруудаас улсын наадамд их дуртай.
-Хүсэл бүхэн тань биелэх болтугай. Дүүдээ баярлалаа.

 П.Ундраа