Г.Шүрэнчулуун: Боржигон түмний босоо цагаан хийморийг хүсэн ерөөж мэндчилье.

Эрхэм хүндэт монголын малчин түмэн олон, уяачиддаа өнтэй сайхан өвөлжиж,  урин  хавартай  золгохын өлзийтэй ерөөлийг дэвшүүлэн  Боржигон түмний босоо цагаан хийморийг хүсэн ерөөж мэндчилье.
Манай Говьсүмбэр аймаг нь тал хээрийн нутаг ихтэй, их богд эзэн Чингис хааны Боржигон овгийн алтан ургийхны үеэс адуун сүрэг идээшлэн бэлчиж байсан үржил шимт бэлчээртэй, Боржигоны богино хөлт хурдан адууны удам угшлаараа алдартай билээ.
Өнгөрөн одож буй онд Монгол улсын Алдарт уяач Ч.Цэрэндэжид уяач маань Монгол улсын Манлай уяач гэсэн эрхэм цол алдарыг авч нутгийн олон болон залуу уяачдаа урам зориг өгөн омогшуулж байна. Улс, аймаг, бүсийн уралдаанд тогтмол амжилт гарган олон айраг түрүү авч, нутгийнхаа нэрийг өндөрт өргөж яваа ахмад болон шинэ залуу уяачидаараа Боржигоныхон бид бахархаж байдаг.
  Хурдан тууртны хуй тоосонд
  Хийморь лундаагаа хөгжөөн баясаасан
  Хөнгөн цовоо хүүхдийн гийнгоонд
  Хөндий тал нь сэргэн өндөлзсөн
  Ажнай хүлгийн үүрсэх дуунд
  Ааг омгоо ирлэж хурцалсан
Алдар цолоо дуурсган дуудуулж яваа
Амжилт бүтээлийн эзэд
Тост Боржигоны нүнжигтэй уяачдынхаа халуун сэтгэлийн мэндчилгээ дэвшүүлье.

Монголынхоо нийт уяачдад уяа сойлго нь ирлэгдэж, уясан бүхэн нь хурдан байж, унаач хүүхэд нь энх тунх, цовоо сэргэлэн байхыг хүсэн ерөөе.

ГОВЬСҮМБЭР АЙМГИЙН МОРИН СПОРТ УЯАЧДЫН  ХОЛБООНЫ ТЭРГҮҮН    Г.ШҮРЭНЧУЛУУН