Б.Мичидмаа: Хүүхдүүд ээ, Над шиг морь унаж сураад Найрамдалд амраарай

Дорнод аймгийн Хүүхэд, гэр бүлийн хөгжлийн хэлтэс, аймгийн Морин спорт, уяачдын холбоо хамтран шилдэг унаач хүүхдүүдийг Олон улсын хүүхдийн “Найрамдал” зусланд 2012-2013 оны хичээлийн жилийн 1 дүгээр улирлын амралт тааруулан амраалаа. Энэ үеэр тус зусланд амраад ирсэн бяцхан унаач Б.Мичидмаа охинтой хийсэн ярилцлагыг хүргэж байна.
-Миний дүү сайхан өвөлжиж байна уу? Өөрийгөө танилцуулахгүй юу?
-Сайхан өвөлжиж байна. Намайг Болдын Мичидмаа гэдэг. Би 2003 онд төрсөн он гараад 10 нас хүрнэ. Дорнод аймгийн Хэрлэн сумын улсын тэргүүний 5-р сургууулийн 3д ангид сурдаг.
-Анх хэзээ морь унаж сурсан бэ? Хурдан морь унаад ямар амжилт гаргаж байв аа?
-Өвөө маань анх морь унахыг зааж сургаж өгсөн, тэгэхэд би 5 настай өвөөгөө дагаад морь унаад явдаг байсан, 7 настайгаасаа том жижиг наадамд хурдан морь унаад сүүлийн 2 жил аймгийн наадамд морь унаж байна. Бас би энэ зун аймгийнхаа наадмын дараа төрсөн нутаг Увс аймагтаа очиж хурдан морь унасан. Манай ээжийг Одгэрэл гэдэг. Тэнд хамаатангууд маань байдаг юм. Энэ 2012 оны аймгийн наадамд хүрэн даагаа унаж түрүүлсэн, бас хүрэн азаргаа унаж аман хүзүүнд орсон.
-Танай уяанаас өөр ямар морь хурдалсан бэ? Уяа сойлгыг нь хэн тааруулдаг юм бэ?
- Манай уяа зундаа аймгийн төвөөс зүүн тийш Хэрлэн голынхоо урд хөвөөнд гарч морьдоо уядаг, миний өвөө аймгийн алдарт уяач С.Жадамбаа, аав аймгийн арслан Ж.Болд, Бааяа ах гээд олон хүн бий, өнгөрсөн жил аймгийн 80 жилийн ойн баярт хонгор морь, хонгор соёолонгоо айрагдуулсан, энэ жил бас Г.Бадрах ахын хүрэн хязаалан аман хүзүүнд давхисан, гэхдээ аймгийн наадамд өөр хүүхэд унаж уралдсан.
-Найрамдал зусланд амарсан талаараа бусад хүүхдүүдээ ярьж өгөөч?
- Энэ жил би аймгийн наадамд хурдан даагаа унаж түрүүлээд Олон улсын хүүхдийн “Найрамдал” зусланд амрах эрхийн бичгээр шагнагдсан юм. Надтай цуг аймгийн наадамд морио түрүүлгэсэн 4 унаач хүүхэд амарсан, би бүгдтэй нь танилцаж сайхан найзууд болсон, түүн дотроос хязаалангийн түрүү унаач охин Г.Хонгорзул бас байсан шүү. Биднийг эндээс 1-р сургуулийн Цэцэгээ багш ангийнхаа хүүхдүүдтэй цуг автобусаар авч явсан, тэнд Энхээ багш тосож аваад сайхан байлаа. Бас ээж аав эмээ, аймгийн Хүүхэд, гэр бүлийн хөгжлийн хэлтсийн болон аймгийн уяачдын холбооны ах нар, бусад унаач хүүхдүүдийн гэр бүлийнхэн гаргаж өгөөд маш сайхан зүйл үзэж яваад ирсэндээ баяртай байна. Та бүхэндээ баярлалаа гэж хэлье.
-Үеийн хүүхдүүддээ хандаж хэлэх зүйл байгаа биз дээ?
-Над шиг морь унаж сураад Найрамдал зусланд амраарай гэж хэлье.
Эх сурвал: www.dnews.mn