ММСАХ-ны Ерөнхийлөгч Засаг ноён болов

Монгол адууны гайхамшигт чанарыг дэлхий нийтэд таниулахад ихээхэн зүтгэл гаргасан эрхмүүдийн нэг нь Монголын морин спорт аяллын холбооны  Ерөнхийлөгч Ж.Оюунбаатар гэдэгтэй маргах хүн гарахгүй байх. Тэрээр 2009 оноос эхлэн Английн адал явдалт аяллын холбоо болон Өвөрхангай аймгийн “Арвагар хээр” холбооныхонтой  хамтран холын зайн өртөөчилсөн уралдааныг зохион байгуулж байгаа. Үүнээс 1000  километрийн  “Монгол дерби” уралдаан  2010 оны 08-р сарын 17-нд дэлхийн хамгийн холын зайн уралдаанаар албан ёсоор бүртгэгдсэн юм. Ийнхүү монгол адууны тэсвэр тэвчээрийг дэлхий нийтэд таниулахад ихээхэн хичээл зүтгэл гаргасан Ж.Оюунбаатар Ерөнхийлөгч хэдхэн хоногийн өмнө Хэнтий аймгийн Засаг даргаар томилогдсон бөгөөд, манай сайтаар дамжуулан Монголын нийт ард түмэнд, тэр дундаа хурдан морь сонирхогчдодоо мэндчилгээ дэвшүүлснийг хүргэж байна.

МЭНДЧИЛГЭЭ

Моринд хайртай монгол түмэн маань шинэ 2013 онтойгоо золгож байна. Монголчууд бид шандаст хурдан хүлгийнхээ зоон дээр дэлхий дахинаа алдар суугаа дуурсгасан олон бахархам үйлсийг бүтээсэн билээ. Хорвоогийн хосгүй уянгат эгшгийг хоёрхон чавхдасаар дуулдаг морин хуураа дээдэлсэн манай ард түмэн морин эрдмийн яндаж баршгүй их эрдэм чадалтай.
   Дундаршгүй энэ эрдмийг зуурдаар гээх аюулаас гэтэлгэх оюуны гэрэлт хуудсуудаар уншигч түмнийхээ мэлмийг мялааж, оюуныг гийгүүлж байдаг “Тод магнай” сэтгүүлийн редакцийн хамт олон, уншигчдад шинэ ондоо амны хишиг дүүрэн, аз хийморьтой байхын ерөөл дэвшүүлье.
   Шинэ 2013 онд Хэнтий аймаг байгуулагдсаны түүхт 90 жилийн ой тохионо. Хан Хэнтий нутаг хэзээнээсээ Галшарын удамт хурдан хүлэг морьдоороо алдартай билээ. Бид Хардэл жанжин бэйс өвгөн ноён Пүрэвжавын өв эрдмээс судлан сурталчлах, Галшарын хурдан угшлын адуун сүргийг өсгөн үржүүлэхэд урьд урьдаас илүү анхаарч ажиллахаар зорьж байна. Цаашилбал уяач ардынхаа ур ухааныг дэлхийн дэвжээнд шинжлэх ухааны үндэстэй хөгжүүлэн баяжуулах эрхэм зорилт энэ цагийн уяач, хурдан морь судлаачдын өмнө тулгарч байгаа юм. Энэ салхийг “Тод магнай” сэтгүүл тодоос тод магнайлан түүчээлнэ гэдэгт итгэж байна.
   Та бүхэнд амжилт хүсье.
Монголын морин спорт, аяллын холбооны Ерөнхийлөгч,
Хэнтий аймгийн Засаг дарга Ж.ОЮУНБААТАР