Монголчууд оюун ухааны олимпийн аваргатай боллоо

Туркийн Анталя хотноо оюуны спортын хамгийн том тэмцээн болох дөрвөн жилд нэг удаа болдог оюуны олимп буюу “MEMORIAD-2012” тэмцээн энэ өдрүүдэд үргэлжиж байна. Энэ сарын 23-нд эхэлсэн тус тэмцээнд урьдчилсан шатнаас шалгарсан дэлхийн 20 орны 89 оюуны спортын шилдэг тамирчид нийт арван төрөлд өрсөлдөж байгаагаас манай улсаас ой тогтоолтын олон улсын мастер Х.Хатанбаатараар ахлуулсан таван тамирчин оролцож байна. Өчигдөр хөзрийн төрөлд ОУИМ С.Акжол нэг багц хөзрийг 51 секундэд цээжлэн алдаагүй нэрлэснээр мөнгөн медаль хүртээд байсан бол өнөөдөр ой тогтоолтын дэлхийн аварга Т.Мягмарсүрэн "Хүн хуанли" төрлөөс, С.Цогбадрах “Flash Numbers" төрлөөс алтан медаль хүртэж оюуны олимпийн аварга боллоо. "Flash Numbers" төрөлд түрүүлсэн С.Цогбадрахын хувьд 300 цифрийг нэг ч алдалгүй санаж түрүүлэн дэлхийн рекордыг тогтоожээ. "Flash Numbers" төрлийн дүрэм нь нэг секунд тутамд дэлгэцэн дээр анивчиж гарч ирсэн цифр болох нийт 300 цифрийг (300 секунд) цээжлэн буцаж алдалгүй санах. Хэрвээ буцаж бичихдээ нэг л цифр алдвал алдсанаас хойш хичнээн зөв байсан ч оноонд тооцохгүй аж. Мөн тооны марафон төрөл нь нэг цагт 2300 цифр цээжилж 2300 оноо авахаас 1620 оноогоор С.Акжол V байр эзэлсэн байна. “Нэр, зүс, царай” цээжлэх төрөлд Х.Хатанбаатар VIII байр, С.Цогбадрах XVI байр эзэллээ. Энэхүү төрөлд манай тамирчид өндөр амжилт үзүүлж болох байсан боловч тухайн төрлийн программ нь монгол хэл дээр байгаагүй учир англи хэл дээр нэрээ цээжилж буцаж санаж байсан байна. Бусад орны тамирчдын хувьд өөр өөрийн хэл дээрээ цээжилж байжээ. Ийнхүү манай тамирчид оюун ухааны олимпоос хоёр алт, нэг мөнгөн медаль хүртээд байна. Манай баг тамирчид одоо гурван төрөлд оролцоно.

0 Сэтгэгдэл

ХХЗХ-ны журмын дагуу зүй зохисгүй зарим үг, хэллэгийг хязгаарласан тул ТА сэтгэгдэл бичихдээ хууль зүйн болон ёс суртахууны хэм хэмжээг хүндэтгэнэ үү. Хэм хэмжээг зөрчсөн сэтгэгдэлийг админ устгах эрхтэй.

    Сэтгэгдэл бичигдээгүй байна