Их эзний таалалд нийцсэн эгэл уяач

Морь уях төрийн их хэрэгт үе дамжин шимтэж яваа удамт уяачдын нэг  Сүхбаатар аймгийн Мөнххаан сумын уугуул, олноо “Бураа” хэмээн алдаршсан, аймгийн Алдарт уяач Шаравын Пүрэвжав их эзэн Чингис хааны мэндэлсэн өдөр алтан гадас одонгоор энгэрээ мялаан, моринд элэгтэй монгол түмнээ баярлуулсан юм. Буурлын буян шингэсэн удамт хурдан хүлгэдээ халх даяар тарааж, монгол наадмыг чимж буй Алдартыг хурдан морь сонирхогчид эчнээ таних билээ. Түүний унаган хүлэг Доржпүрэвийн хүрэн хязаалан 1999 оны төрийн их баяр наадамд  аман хүзүүдэж, Намжилдоржийн нэртэй хул үрээ нь айргийн таваар хурдлан томоохон наадмын өм нээгдэж байсан бол тэр цагаас хойш төрийн наадмын түрүү Дарамренчингийн алаг, улс, Их хурдын айраг Б.Ганбатын Босоо дэлт хүрэн, гурван бүсийн наадмын айргийн эзэн Э.Цолмонгийн Наран шарга, төрийн наадмын түрүү Б.Эрдэнэгэрэлийн хонгор, улсын наадмын айргийн тав Г.Баттөмөрийн халиун алаг гээд олон унаган хүлэг нь алтан жолоо өргүүлэнг түмэн эхийг дуудуулсан. Ийнхүү унаган хүлгэдээрээ халхын дэвжээнд магнай тэнэгэр наадаж, хурд тарааж буй буурал уяачдадаа төрийн дээд шагнал хүртсэнд нь баяр хүргэж, эрүүл энх, урт удаан наслахыг хүсэн ерөөе. Таныг болон үр хүүхдийг тань хурдан хүлгийн босоо цагаан хийморь өнөд ивээж явах болтугай.

"Тодмагнай" сайтын хамт олон