Даян аварга Должингийн Гомбожав

Аваргын алдар: Должингийн ГОМБОЖАВ (ХҮДЭР)    
Төрсөн он(жил): 1810 оны орчим
Нутаг ус: Сэцэн хан аймаг Мин засгийн(засаг Минжүүрдоржийн) хошуу(одоогийн Дорнод аймгийн Баянтүмэн, Хэрлэн, Булган, Сэргэлэн, Чойбалсан сумд бүтнээр, Цагаан-Овоо, Баяндун сумдын хагас орно)
Цол чимэг: даян аварга
Барилдааны амжилт: Даншиг наадамд 1836 онд 10 давж арслан цол, 1838 онд 10, 1841 онд 10 давж үзүүрлэсэн, 1837 онд 6, 1839 онд 7 давж шөвгөлсөн бол тусгай даншигт 1843 онд 6,1844 онд 5 давж шөвгөлсөн. Уул тайлгын наадамд 1838, 1839, 1843 онд тус бүр 7 давж үзүүрлэн, 1836 онд 5(шонхор цол), 1837 онд 6, 1842 онд 5, 1844 онд 5 давж шөвгөлсөн.
Гол онцлог: Хамгийн анх 1835 онд уул тайлгат 3, даншигт 5, сүүлд 1848 оны даншигт 5, 1849 оны уул тайлгын наадамд 2 давж байсан энэ аваргын тухай домог яриа олон буй. Энэ аваргын өргөж тавьсан үхрийн дайтай том чулуу (”Үүнийг Сан бэйсийн хошууны Хүдэр даян аварга Гомбо хэмээх хүн өргөж тавилаа, Ийм хүчтэй хүн байсныг хожмын хүмүүс мэдтүгэй гэсэн” хятад бичигтэй) Баянтүмэнээс Долнуур орох замд байдаг хэмээн Ж.Дамдин гуай бичжээ. Дээрх шавийн Гомбожавт 1841 оны даншигт арслан цолтой 10 давж үзүүрлэхэд нь аварга цол олгосон бололтой, 1842 оны уул тайлгын наадмаас аварга цолтой барилдаж эхэлжээ. Тэр үед Мин засгийн олон Гомбо(Гомбожав) барилдаж байсан болохоор хооронд нь хольж хутгах явдал их байдаг билээ.  
Дархан мэх: тохой алгадан тахимдах, хавсрах, дагуулж тонгорох

Бөх судлаач Б.Цогтбаатар