А.БҮДДОРЖ: “Говь шанхын хүлэг”

                                                    
 Өмнөговь аймгийн Цогтцэций  сумын уугуул залуу яруу найрагч, морь цоллооч  А.Бүддоржийг энэ удаагийнхаа  “Онгодын асар” булангийн зочноор урилаа. Өмнийн говь богино долгионы радиогийн хөтлөгчөөр ажилладаг тэрээр “Ардын билиг авъяастан” язгуур урлагийн наадмын шилдэг оролцогчоор шалгарч байсан юм.
                                                                                                                                           
Гэсэр гэлэнгийн хулын домогтой
Говь шанхын нутаг миний нутаг
Шавагтайн хонхорт босоо төрсөн унага
Шанхайн энгэрт босоо төрүүлсэн хүлэг
Шар бор хонгорыг нар зөв эргэсэн ажнай
Шандастай хурдан байдаг юмаа
Өрнө дорно хоёрыг өмнө хойно нь холбож
Өртөө газар тарлах өмнийн говийн хүлгүүд хурдан юмаа
Энгэр цагаан хайрханы энгэрт нь хөлсөлж
Ихэр жавхлантын ард нь тарлаж
Элгэн задгайн рашаан хүртсэн
Энэ хүлэг ижилгүй хурдан юмаа.
Уралдаж яваад тасарч ирдэг
Унаган шанхайн ёс юм.
Улсад нэртэй нутаг юм
Их шанхай нутаг минь
Ижилгүй хурдан юмаа
Өнө мөнхөд хурдлах
Өөдлөхийн Пүрэвийн хурдан саарал
Хурдан морьт Баваа Содномын
Хулгар хонгорын домогт хүлгүүд  минь ээ
Төрсөн болгон нь уяач болдог
Унасан болгон нь хурдан байдаг.
Уралдаж  яваад тасарч ирдэг
Унаган шанхайн ёс юм
Улсад нэртэй нутаг юмаа.
Улсад түрүүлсэн түүх байхад
Урдаа тоос гаргахгүй ээ
Унаган шанхай уул минь байхад
Ухаа хонгор зүс тодорноо
Хүлэг нь хүртэл босоо ирдэг
Хүүхдийн гийнгоонд тасарч ирдэг  ажнай минь ээ
Сугандаа нар зөв эргүүлэгтэй төрдөг
Говь шанхын хүлэг
Суман цэргийн жагсаал шиг
Энэ говь шанхын хэц
Шанхын хүлэг хурдан байлгүй яадаг юм
Шавагтайн хонхор дүүрэн байлгүй яадаг юм
Хурай хурай хурай
ИХ ШАНХЧУУД МИНЬ ЭЭ