Английн шилдэг уяач Жон Госден

А.Тэлмэн
2012 оны 10-р сарын 15 -нд

Монгол Жоки Клубын гишүүд Таттерсалсийн дуудлага худалдаанаас адуу худалдаж авах ажлаар Англид байхдаа Нью Маркет хотноо 7 хоносон юм. Эртний түүхтэй Нью Маркет хот нь ёстой л адууны орон байв. Энэ хотод Жоки клуб, адууны томоохон аж ахуй, морин тойруулга, худалдаа, эмнэлэг, агент, дэлгүүр, бэлтгэлийн талбай гээд адуутай холбоотой бүхэн байлаа.

Биднийг дуудлага худалдааны чөлөөгөөр дээрх бүх газруудаар зочилж, ажил хэргийн холбоо тогтооход манай клубын гишүүн Жеймс Уиган ихээхэн тус хүргэсэн юм. Жеймсээр дамжуулан олон хүнтэй танилцсаны дотор өнөө цагийн Английн алдартай уяачдын нэг Жон Госден байв. Тэрээр Хенри Сесил, Айдан О’Брайн нарын хамтаар Английн тэргүүн уяачаар нэрлэгдэж байгаа билээ.

Жеймс Уиган болон түүний эхнэрийн эзэмшлийн Натаниел хэмээх алдартай хүлгийг уядаг гэдгээр нь Жон Госдены тухай өмнө сонссон байв. Дашрамд сонирхуулахад Галилео-н төл Натаниел нь Кинг Эдвард Стейкс, Кинг Жорж энд Куйн Эликабет Стейкс, Эклипс Стейкс зэрэг томоохон уралдаануудад түрүүлсэн, дэлхийн чансааг тэргүүлэгчдийн нэг юм.

Жеймс Уиган болон түүний үйлчлүүлэгчдийн олон хурдан адуу Жон Госден дээр уягддаг ажээ. Америк маягийн задгай яриатай, өндөр нуруутай Жон Госден биднийг зүчээн дээрээ хүлээн авч танилцаад, за залуучууд жоохон алхах болно доо гээд өөрийн уяж байгаа адуунуудаа үзүүллээ. Адууны байрнууд хэсэг хэсгээрээ бага зэрэг тусдаа байрлах тул Госдены хэлнээр зүчээ хооронд алхацгаалаа. Тэрээр 200 гаруй адуу уяж байв. Эдгээрээс Жеймс Уиганы хариуцдаг адуунуудыг үзүүлж, адуу нэг бүр дээр очиж биеийн байдал, хийж байгаа ажлууд, хэзээ уралдах боломжтой зэргийг танилцуулав. Жеймс Уиган үзсэн адуу нэг бүр дээрээ тэмдэглэл хөтөлж байв.

Бид Жон Госдены зүчээнд зочилсныхоо маргааш Нью Маркет хотод болсон нэгэн уралдааныг эзэхэд түүний уясан үрээ нэг гараанд нь түрүүлж байлаа.

Ингээд Английн шилдэг уяач Жон Госдены тухай та бүхэндээ товч танилцуулъя.

Английн Сассекс мужид төрсөн Жон Госден нь Кембрижийн их сургуулийг эдийн засагч мэргэжлээр төгсжээ. Тэрээр сургуулиа төгссөнийхөө дараа Английн агуу уяачид болох Винсиент О’Брайн, Сэр Ноел Марлес нарын туслахаар ажиллаж эхэлсэн байна. Энэ үедээ Дерби болон Сейнт Лежер-с түрүү хүртэж байв. Улмаар 1979 онд АНУ-д шилжин уяачаар ажиллах болсон байна. Тэрээр 1989 оныг хүртэл АНУ-д морь уяхдаа Бридерс Кап Майл тэргүүтэй хэд хэдэн уралдааны түрүү хүртэж, авъяаслаг уяач гэдгээ харуулсан байна. Дараа нь Нью Маркет-д буцан ирснээсээ хойш Бридерс Кап Классик, Төрф болон Дерби, Сейнт Лежер, 1000 Гинеа, Куйн Эликабет Стейкс, Эклипс Стейкс зэрэг дэлхийн топ уралдаануудаас түрүү хүртэн Английн тэргүүлэх уяачаар нэрлэгдэх болжээ. Түүний уясан хурдан хүлгүүд Англи, АНУ, Герман, Франц, АНЭУ, Ирланд зэрэг улсуудад түрүү магнай болж, нийт 2500 гаруй түрүү аваад байна.

Эх сурвалж http://www.mongoljockeyclub.com

0 Сэтгэгдэл

ХХЗХ-ны журмын дагуу зүй зохисгүй зарим үг, хэллэгийг хязгаарласан тул ТА сэтгэгдэл бичихдээ хууль зүйн болон ёс суртахууны хэм хэмжээг хүндэтгэнэ үү. Хэм хэмжээг зөрчсөн сэтгэгдэлийг админ устгах эрхтэй.

    Сэтгэгдэл бичигдээгүй байна