Унаач Б.Өлзийхутаг: Хоймор дүүрэн медальтай, олон хурдан адуутай уяач болно

Өмнөговь аймгийн тэргүүний сурагч, "Таван онцын эзэмшигч", "Өмнийн говийн хүлэг" холбооны шилдэг унаач Батмөнхийн Өлзийхутагтай ярилцлаа  

-Миний дүү хэдэн настайгаасаа морь унаж байна вэ?
- Долоон настайгаасаа хурдан морь унасан. Одоо найм дахь жилдээ унаж байна. Манайх аймгийн төв дээр байдаг болохоор зуныхаа амралтаар л хөдөө гарч  морь унадаг байлаа. Анх Батчулуун ахын хүү нь хурдан морь унах аргыг зааж өгсөн юм. Гараанаас гарахаас эхлээд барианд орох хүртэлх нарийн ширийнийг сэтгэл харамгүй зааж өгсөн дөө.  
- Энэ хугацаанд хэн хэний ямар ямар хурдан хүлгэдийг унаж уралдав?
- Ханхонгор сумын харьяат аймгийн Алдарт уяач Батчулуун ахын морийг анх унадаг байсан.  Одоо Буянтогтох ахын морийг унаж байгаа. Буяа ахын морийг унаад дөрвөн жил болж байна. 
- Нэг удаагийн наадамдаа хичнээн насны морьд унаж байна?
- Нэг наадамд дөрвөн насны морь унадаг.
- Наадмын өмнөх өдөр  юу бодогддог вэ?
- Хэдийгээр хурдан морь унаад найман жил өнгөрч байгаа ч  анх удаа уралдах байгаа юм шиг л мэдрэмж төрүүлдэг. Маргааш уралдана гэхээр сэтгэл гэгэлзээд нойр хүрдэггүй юм. Хаа нэг зүүрмэглэх бол тэр морио тэгж давхиулна гээд л зүүдэлнэ шүү дээ. Уралдаад айраг түрүү авчихаад зогсохдоо хамгийн жаргалтай байдаг юм.
- Хамгийн их унах дуртай ямар морь байна?
- Батчулуун ахын цэгээн азаргыг унах дуртай байсан.  Бид олон ч наадамд уралдсан даа. Ер нь морин дэл дээр салхи татуулан хурдлах цаанаа л гоё шүү.
- Энэ жил ямар наадамд уралдав? Хэчнээн айраг түрүү хүртсэн бэ?
- Буяа ахынхаа морийг унаж Булган, Ханхонгор сумуудад уралдсан. Нэг морио айрагдуулсан.
- Өвөл хаврын наадамд морь унаж байв уу? Өвөл морь унахад хэцүү байх даа?
- Өвөл морь зөндөө унаж байсан. Мэдээж амаргүй ш дээ. Үнэндээ гараа руу явахдаа аймаар даардаг юм.  Харин эргэчих юм бол даарахын зовлонгүй л дээ. Өвлийн наадам цастай хүйтэн болохоос бусдаараа зуныхаас ялгаагүй.
- Унаач болсоор ямар шагнал авсан бэ?
- Хавар болсон улсын унаач хүүхдүүдийн чуулга уулзалтанд яваад “Таван онцыг эзэмшигч” гэсэн шагнал авсан. 2010 онд өвөө надад нэг даага өгсөн юм. Тэр даагаа Шавартад очиж түрүүлгээд  алтан медаль авсан. Бас 2011оны сургуулийн тэргүүний сурагч болсон. 
- Миний дүү өөрөө морь уядаг юмуу?
- Даагыг маань Буяа ах уясан юм. Тэр наадамд өөрийнхөө даагыг унаж түрүүлгээд нэг дор хоёр медаль авчихаад үнэхээр их баярласан. Хожим санахад хамгийн гоё уралдааны нэг байх байх даа. Би том болоод уяач болно. Тийм болохоор одооноос Буяа ахаараа морь уяхыг заалгаад эхэлчихсэн. Гэрийнхээ хоймороор дүүрэн медальтай, олон сайхан хурдан адуутай уяач болно гэж бодож байгаа.
- Баярлалаа. Сайн уяач болоорой.    
А.Мөнх