Баянзүрх уулын хишиг зургаа дахь жилдээ

Дөрвөн уулын хишиг барилдааныг МҮБХ-ноос зохион байгуулдаг болоод зургаан жилийн нүүр үзэж байна. Хишиг барилдааны нээлт болдог Баянзүрх уулын хишигийг өнгөрсөн жил “Бриж” группийн 20 жилийн  ойтой хамтатган зохион байгуулж байсан. Энэ жил мөн л Бриж групп МҮБХ-той хамтран аравдугаар сарын 14-ны ням гарагт зохион байгуулна. Зургаа дахь жилдээ зохиогдож байгаа чансаа өндөртэй, нэр хүнд бүхий энэхүү барилдааны түүхээс сонирхуулж байна. Уламжлал ёсоороо үзэгчидээс хагас саятан хоёрыг азтан үзэгч хоёрыг тус тус тодруулах болно.
Баянзүрх уулын хишиг барилдаан-I
2007 оны аравдугаар сарын 13-ны бямба гарагт анхлан зохион байгуулжээ. Энэхүү барилдаан Баянзүрх уулын эхнийх  төдийгүй Дөрвөн уулын хишиг барилдааны анхных байсан түүхтэй. 
Улсын арслан Д.Азжаргал түрүүлж, улсын харцага Т.Мөнгөнцоож үзүүрлэж, их шөвөгт улсын начин Г.Эрхэмбаяр, улсын начин Ш.Уламбаяр нар шалгарав
Аймгийн арслан Төмөрхүүгийн Энх-Амгалан улсын цолтнуудыг шороодуулсаар наймд үлдсэн. Түүнтэй хамт улсын начин М.Өсөхбаяр, улсын харцага Д.Баасандорж, улсын начин И.Ёндонсамбуу нар дунд шөвөгт шалгарч байлаа.
Баянзүрх уулын хишиг барилдаан-II
2008 оны аравдугаар сарын 11-ний бямба гараг
Даян аварга Г.Өсөхбаяр торолгүй түрүүлж, улсын гарьд И.Доржсамбуу үзүүрлэв. Мөнхсайханы Өсөхбаяр, Б.Соронзонболд нар их шөвөгт шалгарч, шинэ начин Ш.Тогтохбаяр, улсын арслан Д.Азжаргал, улсын начин Ду.Батбаяр, улсын харцага М.Баяржавхлан нар наймд үлджээ. Өсөхбаяр аварга тэр намрын хишиг барилдаануудад хоёуланд нь түрүүлсэн юм.
Баянзүрх уулын хишиг барилдаан-III
 2009 оны аравдугаар сарын 11-ний ням гараг
Улсын заан Б.Соронзонболд түрүүлж, улсын начин Д.Лхагвадорж үзүүрлэжээ. Алтай нутгийн хоёр бөх ийнхүү тэргүүн байр булаацалдсан бөгөөд их шөвөгт аймгийн начин П.Бүрэнтөгс, улсын харцага Ө.Даваабаатар гэсэн Олимп сургуулийн хоёр шалгарав.
Дунд шөвөгт улсын арслан Д.Азжаргал, улсын харцага Ө.Бат-Орших, улсын заан М.Өсөхбаяр, улсын гарьд И.Доржсамбуу нар үлдсэн байна.
Баянзүрх уулын хишиг барилдаан-IV
2010 оны арванхоёрдугаар сарын 18-ны ням гараг      
Хүчит 256 бөхөөс Дугардоржийн Батбаяр түрүүлж, улсын начин Нямаагийн Батзаяа үзүүрлэжээ. Аймгийн арслан Л.Лха-Очир, аймгийн начин Н.Батсуурь нар их шөвөгт шалгарсан.
Дунд шөвөгт Д.Рагчаа, Б.Соронзонболд, Т.Өсөх-Ирээдүй, Б.Сангисүрэн нар үлдэв. Батзаяа энэ өдөр Хантайширынханыг цувуулж хаясаар үзүүрлэсэн бөгөөд тэргүүн байрын төлөө л Ду-г дийлээгүй юм. Батзаяа начин өмнөх даваануудад улсын начин Л.Гантулга, аймгийн арслан Л.Цэрэнтогтох, улсын заан Б.Соронзонболд нарыг өвдөг шороодуулсан байв.
Баянзүрх уулын хишиг барилдаан-V
Өнгөрсөн жил Арванхоёрдугаар сарын 18-нд болж улсын арслан Гунаажавын Эрхэмбаяр найм даван түрүүлж, улсын харцага Ө.Бат-Орших үзүүрлэв. Их шөвөгт Цэдэнбазарын Одбаяр, Батмөнхийн Сангисүрэн нарын шинэ начингууд томчуудыг нураасаар шалгарсан юм. Ц.Одбаяр Д.Батболдыг, Ц.Мягмарсүрэн, До.Ганхуягийг  Б.Сангисүрэн Ц.Содномдорж, А.Бямбажав Х.Мөнхбаатарыг шороодуулж байсан юм. Архангай аймгийн арслан Л.Шинэбаатар гарьд Ганбаатарыг орхиж 16-д үлдэв.