Найман шаргын бэлэг

“Арвагар хээр” холбооны тэргүүн, Монгол улсын Манлай уяач Т.Энхбат Өвөрхангай аймгийн Бүрд сумын уугуул нэгэн. Анх Алдарт уяач Нямдаваа найз нь хурдан удмын адуу  бэлэглэсэн нь Энхбат Манлайг хурдан моринд урвуулж орхисон гэдэг юм. Түүнээс хойш богино хугацаанд улс бүсийн наадмаас 11 айраг түрүү авч  Монгол улсын Алдарт уяачийн болзолыг хангаж байлаа. Үүнээс гурван жилийн дараа буюу 2008 онд Монгол улсын Манлай уяач болж амжилтаа бататгасан байдаг юм. Түүний энэхүү амжилтыг төрсөн нутаг Бүрдийнхэн нь “нутаг усныхаа нэрийг  гаргаж, Монгол улсын Манлай уяач цол хүртсэн”-ийг мялаан зүс ижил найман шарга мориор бэлэг барьж байжээ. Сүргийнхээ сор болсон хүлгэдээ шилж, нуруу зүсээр ижилсүүлсэн энэхүү сэтгэлийн бэлэг нь Манлайн авсан хамгийн нандин бэлгүүдийн нэг гэдэг. Ямартаа ч удахгүй Манлайн энэ найман шарга төрийнхөө наадамд тоосоо өргүүлэн хурдлах бизээ.