Нээлтийн барилдаанд Улсын начин Р.Пүрэвдагва түрүүлэв

Энэ намрын нээлтийн барилдаан өчигдөр (09.09) Монгол бөхийн өргөөнөө болж өндөрлөлөө. Барилдаанд улсын заан Б.Соронзонболд, улсын харцага А.Цацабшир, А.Бямбажав, улсын начин Ц.Лхагвасүрэн, Ш.Уламбаяр, Б.Гончигдамба, Ду.Батбаяр, Д.Цогзолдорж, Б.Батмөнх, Б.Сангисүрэн, Б.Амарзаяа, Р.Пүрэвдагва нарын тэргүүтэй улс аймгийн алдар цолтой хүчит 208 бөх зодоглосноос Архангай аймгийн Булган сумын харъяат Алдар спорт хороо, Бөхбилэгт дэвжээ, Хера холдинг ХХК-ний бөх улсын начин Р.Пүрэвдагва түрүүлж, Төв аймгийн Баянхангай сумын харъяат Хилчин спорт хороо, Дүнжингарав дэвжээ, ИНЕГ-ын бөх улсын начин Б.Батмөнх үзүүрлэлээ.

Их шөвгийн дөрөвт Төв аймгийн Баяндэлгэр сумын харъяат Сүлд спорт хороо, Дүнжингарав дэвжээ, Нью хаппи ХХК-ний бөх аймгийн хурц арслан Ч.Батчулуун, Сэлэнгэ аймгийн Жавхлант сумын харъяат Алдар спорт хороо, Таванхан дэвжээний бөх аймгийн хурц арслан Б.Одгэрэл нар шалгаран үлдэв.

Барилдааны хоёрын даваанд улсын начин Ц.Лхагвасүрэн Шонхор Олимп дээд сургуулийн бөх сумын заан Д.Энхболдод, улсын начин Ш.Уламбаяр Увс нуур дэвжээний бөх сумын заан Х.Оргилболдод, улсын начин Д.Цогзолдорж НХЭГ-ийн бөх сумын заан Б.Баянмөнхөд тус тус тахим буулгав. Өчигдрийн барилдаанд томчуудыг дараалан өвдөг шороодуулж шуугиулсан бөх Увс аймгийн Тэс сумын харъяат Увснуур дэвжээний бөх сумын заан Х.Оргилболд байлаа. Тэрээр аймгийн начин Т.Шинэзоригоор нэг давсан бол хоёрын даваанд улсын өсөх идэр начин Ш.Уламбаярыг, гурвын даваанд улсын начин Ду.Батбаярыг, дөрвийн давааны нугалаанд улсын заан Б.Соронзонболдыг өвдөг шороодуулж, тавын даваанд энэ барилдааны үзүүр бөх улсын начин Б.Батмөнхөд унасан юм.

Тавын даваа

1.А.Цацабшир у.х - гоц мөргөв
2. Б.Батмөнх у.н - Т.Оргилболд с.з
3. Б.Сангисүрэн у.н - Л.Батзориг а.з
4. Б.Амарзаяа у.н - Бо.Батжаргал а.а
5. Р.Пүрэвдагва у.н - Б.Бадамсүрэн а.з
6. Ч.Батчулуун а.х.а - Л.Цэрэнтогтох а.а
7. Б.Одгэрэл а.х.а - Л.Лха-Очир а.а

Зургаагийн даваа

1. А.Цацабшир у.х - Б.Одгэрэл а.х.а
2. Б.Батмөнх у.н - гоц мөргөв
3. Б.Сангисүрэн у.н - Ч.Батчулуун а.х.а
4. Б.Амарзаяа у.н - Р.Пүрэвдагва у.н

Долоогийн даваа

1. Б.Батмөнх у.н - Ч.Батчулуун а.х.а
2. Р.Пүрэвдагва у.н - Б.Одгэрэл а.х.а

Наймын даваа

1. Б.Батмөнх у.н - Р.Пүрэвдагва у.н