ХХААХҮЯ-ны сайд Т.Бадамжунай:Адуун туурайн тоос бурханы оронд тахил болж байдаг

Эрийн хийморь эмээлт моринд оршдог хэмээн үздэг уяач улс төрчдийн нэг нь ХХААХҮЯ-ны сайд Т.Бадамжунай. Гадна, дотноос авсан, гарын бэлгэнд ирсэн гээд сайдын хурдан хүлгэдийн тоо хэдийнэ гурван оронтой тоог давсан  ч төрийн алба их тул тэр бүр адуугаа эргэж чаддаггүй гэсэн. Гэвч эзний сэтгэл  дагасан хурдан хүлгэд нь сүүлийн жилүүдэд урамтай сайхан наадан, төрийн наадамд хоёр дахиа айрагдаад байна. АХ-ын 89 жилийн ойн баяр наадамд Цахиур халзан үрээгээ айргийн дөрөвт хурдлуулан улсын  наадмын анхны хишиг хүртэж байсан сайд энэ жил АХ-ын 91 жилийн ойн баяр наадамд хүрэн соёолонгоо айрагдуулан магнай тэнэгэр сууна.
-Төрийн наадамд соёолон айрагдуулсан танд баяр хүргэе.Сэтгэгдлээсээ хуваалцахгүй юу?

-Баярлалаа. Уяачдын унших дуртай “Тод магнай” сэтгүүлээрээ дамжуулан Монголынхоо нийт ард түмэнд баярын мэнд дэвшүүлье. Нар хур тэгширсэн энэ жилийн баяр наадам өргөн дэлгэр сайхан болж, миний хүрэн айргийн гурваар давхилаа. Монголчууд соёолон адууг бусдаас  илүүтэй онцлон үздэг уламжлалтай. Тэр утгаараа баяртай сайхан байна.
-Сайдын нэртэй адуу улсын наадамд хоёр дахиа айрагдаж байна. Бүсэд бол нэлээн хэд орсон байхаа?
-Тэгсээн. Бүсийн наадмаас арваад айраг түрүү бий байх. Улсын наадмаас бол хоёр дахь айргаа авч байна. Өмнө нь АХ-ын 89 жилий ойгоор Цахиур халзан үрээгээ айрагдуулж байсан.
-Юу таныг хурдан моринд оруулсан юм бэ?
- “Монгол эр хүн, ялангуяа хөдөө өссөн хүн мориноос хол байна гэдэг хэцүү. Морины алтан туурайнаас гарсан тоос гэдэг бидний очиж чадахгүй бурханы газарт тахил болж байдаг гэдэг. Сайн морь эзнийхээ өмнө өөрийгөө оруулж чаддаг ч гэдэг. Ер нь морьтой холбоотой болгон гэгээн ариун байдаг. Тэр утгаар нь би адуунд  дуртай. Нутгийн адуун дээрээ суурилан Монголын хурдны цөм болсон Хэнтий Сүхбаатараас адуу авсан.  Монгол улсын Манлай уяач Б.Содномцог,Алдарт уяач  Б.Буяндэлгэр нарын хамт “Од” галд  морьдоо уядаг. “Од” нэртэй хээр соёолон маань тасархай түрүүлж магнай тэнийлгэсэн тэр жил бид галаа байгуулсан юм.
-Сэтгэгдлээ хуваалцсан  танд баярлалаа. Хурдан морины босоо цагаан хийморь өнөд ивээх болтугай.