"Сойл трейд" ХХК ийн захирал А.Ариунсайхан: Хөөрхөн зээрдээ түрүүлнэ чинээ зүүдлээгүй

-Төрийн наадмын түрүү хүртлээ, баяр хүргэе. Сэтгэгдлээсээ манай уншигчидтай хуваалцахгүй юу?
-Баярлалаа. Төрийн баяр наадамд зээрд үрээ маань түрүү магнайд хурдлан торгон жолоо өргүүллээ. Энэ мэдээг дуулсан гадаад дотоодод байгаа найз нөхөд,танилууд баяр хүргээд сайхан байна. Би хотын унаган хүүхэд. Гэхдээ аавынхаа нутаг Говь-Алтай аймгийн Жаргалан сумаараа овоглож явдаг. Тийм болохоор Алтай нутгийн хүлэг төрийн наадамд түрүүллээ гэсэн үг. Мэдээж  нутаг усныхан маань ч над шиг баяртай байгаа байхаа.
- Хотын унаган хүү хэзээнээс хурдан морины уяа сойлго тааруулах болсон юм бэ?
- Аав минь багадаа сургууль соёлын мөр хөөн нутгаасаа эрт гарсан гэдэг юм. Эрдэмтэн хүн л дээ. Тийм болохоор би морь малын талаар ёстой “А” ч үгүй өссөн. Хожим геологийн мэргэжил эзэмшээд хөдөө гадаа явсаар нэг л мэдэхэд моринд дуртай болчихсон. Ер нь монгол хүн бүрийн сэтгэл зүрхэнд морь ойрхон байдаг юм шиг байгаа юм. Ингээд 2005 оноос морь сонирхох болж Төв аймгийн Эрдэнэ сумын Даваасүрэнгээс хонгор азаргаа авч байлаа. Хонгор азарга надад ирээд жилийн дараа Эрдэнэ сумынхаа наадамд түрүүлсэн нь надад урам нэмсэн. Бас нэг сонирхолтой түүх сөхөхөд найз Балчинпүрэвийн Мөнгөн-Оньсоос охин байдас эхтэй нь авсан юм. Тэгээд хоёр бор гүүгээ Тод манлай Онон гуайн магнай халзан орос азарганд хураалгаад хоёр охин унагатай болсон юм. Тэгсэн 2008 оны хаврын уралдаанаар Манлай Алтангэрэл ахтай таартал: “Бор гүүнүүдийг ямар азарганд хураалгаж, ямар унага гарсан бэ” гэж асуулаа “Тод манлай Ононгийн халзан азарганы төл охин дааганууд байгаа” гэтэл “Чи тэднийгээ өндөр бооцоот дааганы уралдаанд бүртгүүл” гэж зөвлөсөн юм. Хэлсний нь дагуу нэг сарын өмнө уяад уралдуултал жижиг нь аман хүзүүнд давхиж намайг баярлуулж билээ. Ингэж л бор гүүнүүд аргагүй хурдны удамтай юм гэдгийг мэдсэн. Тэр  хоёр даага Хөөрхөн зээрдийн эгч нар юм шүү дээ. 
- Хөөрхөн зээрдээ түрүүлнэ гэхэд итгэлтэй байв уу?
- Үнэндээ Хөөрхөн зээрдээ айргийн тавд орно гэж бодож байсан ч түрүүлнэ гэж бодоогүй. Манай найз Манлай Х.Бат-Эрдэнийн хээрийг дээд настай сунгахад түрүүлсэн. Тийм  болохоор миний үрээ Бат-Эрдэнийн хээрийг арай ч барахгүй юм байна гэж бодож байсан юм. Гэтэл наадмаар хээр өнгөлөөд, зээрд аман хүзүүнд явж байсан ч үзүүр дээрээ түрүүлээд ороод ирэхэд нь үнэхээр их баярласан шүү. Үүнээс өмнө 2010 онд нутагтаа болсон бүсийн наадамд анх оролцож хөөрхөн зээрдээ түрүүлгэж байлаа. Аавыгаа өөд болсноос дөрвөн жилийн дараа нутагтаа наадсан анхны наадам болохоор сэтгэлд тод хоногшин үлдсэн байдаг юм.
- Таны нэрийг гарган давхиж байгаа ямар хурдан хүлэг байна вэ?
- Найз Мөнгөн-Оньсоос авсан хоёр бор гүүнээс гарсан төл болгон хурдалж байгаа. Бас Хөөрхөн зээрдийн ах сайн морь, даанч хөл нь эвгүйдчихээд уралдахгүй байгаа. Ер нь томчууд бүгд мэднэ дээ миний шарга морийг. Улсад орж байгаагүй ч ойрын хэдэн жил гарахгүй морь гэж хэлдэг юм. Улсад арав дотор л давхиж байлаа, харамсалтай нь одоо больсон. 
- Энэ жил хэдэн насанд, хэчнээн морь уралдуулав?
- Миний морьдын уяа сойлгыг Алтан-Эрдэнэ гэж үеэл дүү маань тааруулдаг. Бас “Макс”-ын ах нараасаа зөвлөгөө авна. Туслах уяачид маань туслана гээд олон хүний тус дэмээр өөдрөг сайхан наадаж байна. Энэ жил төрийн их наадамд их морь, азарга, соёолон мордуулсан. Бүгд сайхан давхилаа.
- Баярлалаа. Таныг хурдан тууртын босоо цагаан хийморь өнөд ивээж явах болтугай.