Унаач Б.Ган-Эрдэнэ: Би хязаалан нас унахдаа дуртай

-Хурдан морь унана гэдэг хүүхэд насны хамгийн сайхан дурсамж болж үлддэг юм шиг. Чиний хувьд хэдэн настайгаасаа хурдан хүлгийн зоон дээр давхих болсон бэ?
-Тиймээ. Айраг түрүүнд орсон мөчүүдээ эргээд бодоход үнэхээр бахархалтай байдаг юм. Би анх долоон настайдаа морь унаж сураад есөн настайгаасаа хурдны морь унах болсон. Тэрнээс хойш олон наадамд хурдан морь унасан даа.
-Чи одоо хэддүгээр ангид сурдаг вэ? Хэдэн настай юм?
-Баян-Өлгий аймгийн Буянт сумын 8-р ангид сурдаг. 14 настай.
-Олон уралдаанд оролцсон гэсэн. Ямар наадмаас айраг түрүү авч байв?
-Би Айдос ахынхаа морийг унадаг. Хамгийн анх өөрийнхөө морийг унаад өдөрлөгийн баярт түрүүлж байсан юм. Томоохон уралдаан гэвэл 2011 оны Баян-Өлгий аймгийн улсын баяр наадамд шар цоохор азаргаар түрүүлсэн. Науризийн баяраар шар цоохор азаргаа соёолон байхад нь түрүүлж, мөн улаан буурал мориор аман хүзүүнд хурдалж байлаа. Би аймгаасаа гарч уралдаж байгаагүй ч аймгийнхаа томоохон наадмуудаас айраг түрүү их авсан шүү. 2011 онд нийт долоон түрүү, нэг аман хүзүү авсан.
-Хурдан морь гараанаас гарах тэр агшинд юу бодогддог болоо?
-Амыг нь зуулгаж яваад аль болох болгоомжтой байхыг боддог. Гэнэт гарахаар хүүхдүүд мориноосоо ойчих тохиолдол байдаг. Ер нь түрүүлнэ гэж л бодож уралдана.
-Саяын баруун бүсийн даншгаар морь унасан биздээ? Энд тэндхийн унаачидтай найз болсон уу?
-Даншгаар их насны морь унасан. Гэхдээ байранд ороогүй. Аймгийнхаа унаачидтай найзууд. Бид нар нийлээд суухаараа нэг нэгэндээ зөвлөгөө их өгдөг. Миний хувьд хязаалан нас унахад амар байдаг болохоор найзууд маань тэр талаар их зөвлөдөг.
-Ярилцлага өгсөнд баярлалаа. Сүүлийн асуултыг чамд үлдээе?
-Баярлалаа. Гэр бүлийнхэндээ болон Айдос ахдаа баярлаж явдаг шүү гэж хэлмээр байна.

Ш.Бадмаа