Хатант уулын тахилга наадмын фото мэдээлэл

Долоодугаар сарын 18-нд Архангай аймгийн Хотонт сумын Хатант уулыг тахих тахилга наадам өргөн дэлгэр болж өнгөрлөө. Энэхүү наадмыг “Хатант интернэшнл”, “Хатанду продакшн”, “Пароди” хамтлагийн ахлагч, жүжигчин  Ж.Булган-Эрдэнэ, нутгийн зөвлөлийн дарга Золжаргал нар хамтран зохион байгуулсан юм. Энэхүү овооны тахилга наадамд хүчит 64 бөх уран мэхийг уралдуулан барилдаж, дээд гурван насны хурдан хүлгэд тоос татуулан уралдан, урлаг соёлынхон ая дуугаа өргөсөн томоохон хэмжээний наадам боллоо хэмээн нутгийн наадамчид ярих сонинтой сууна. Хүчит 64 бөхийн барилдаанаас хамгийн ихээр олныг шуугиулсан барилдаан бол шөвгийн дөрөвт шалгарсан Харцага Мөнгөнцоож, Гарьд Бат-Эрдэнэ нарын барилдаан байлаа. Гурвантаа барьц сонгож, үзүүр түрүүнд барилдахаар Харцага Мөнгөнцоож тунаж үлдсэн юм. Ийнхүү үзүүр түрүүний төлөө барилдаанд Мөнгөнцоож Харцага үзүүрлэж, Санжаадамба Заан  түрүүллээ.
Хатант уулын тахилга наадмын түрүү морьдыг нэг сая төгрөгөөр, түрүүлсэн бөхийг хоёр сая, үзүүрлэсэн бөхийг сая төгрөгөөр тус тус шагнажээ. Ингээд тус наадмын хурдан хүлгэдийн цувааг хүргэж байна.

Азарга

1. Түвшрүүлэх сумын Дашчойнхорын үүлэн бор
2. Хотонт сумын Болдоогийн шарга
3. Хужирт сумын Төмөрхуягийн хул
4. Хотонт сумын Наранцогтын саарал
5. Хашаат сумын Улсын заан Санжаадамбын хүрэн
Их нас
1. Хотонт сумын Энхтайваны хонгор
2. Өвөрхангай аймгийн Өлзийт сумын Гомбосүрэнгийн буурал
3. Хотонт сумын Долгормаагийн зээрд
4. Цэнхэр сумын Батхуягийн халтар
5. Хотонт сумын Бадрахын хар
Соёолон
1. Өгий-Нуур сумын Жаргалсайханы хүрэн
2. Хотонт сумын Баярхүүгийн хээр
3. Түвшрүүлэх сумын Амгаасэдийн хүрэн
4. Хотонт сумын Энхбаатарын халиун
5. Хотонт сумын Жагарын хонгор

                                                                                                                                                                 А. Энхжил