Өсвөрийн бөхчүүд медалийн төлөө барилдаж чадсангүй

2012 оны өсвөр үеийн чөлөөт бөхийн ДАШТ Азербайжан улсын Баку хотын Х.Алиевийн нэрэмжит Спорт, урлагийн цогцолборт эхэлж эхний өдөр манай дөрвөн бөх дэвжээнд гарсан ч медалийн төлөө барилдаан хийж чадсангүй. Харин өнөөдөр манай таван бөх барилдахюм.
Өчигдрийн барилдаанд 46 кг-ын жинд Б.Гүндсамбуу /”Алдар” спорт хороо/ нэгдүгээр тойрогт хийлж хоёрдугаар тойрогт Гүржийн бөх Иракли Мхейзейтэй, 54 кг-ын жинд З.Занабазар /”Тэмүүжин” клуб/ нэгдүгээр тойрогт Туркийн бөх Сезгин Писмисоглитэй,  63 кг-ын жинд Н.Амарсайхан /Баянгол дүүрэг, 73 дугаар сургууль/ нэгдүгээр тойрогт хийлж хоёрдугаар тойрогт Киргизийн бөх Сапар Кубандуковтой,  76 кг-ийн жинд Г.Төрмөнх /Дорнод аймгийн уугуул, Орхон аймаг, “Ирээдүйн одод” спортын сургууль/ нэгдүгээр тойрогт Болгарын бөх Раман Фескавецтэй, 100 кг-ын жинд А.Дэлгэрхангай /Сонгинохайрхан дүүрэг/ нэгдүгээр тойрогт хийлж хоёрдугаар тойрогт Азербайжаны бөх Сайд Гамидовтой таарч, ялагдал хүлээсэн байна.

Энэ удаагийн өсвөрийн ДАШТ-д Австри, Азербайжан, АНУ, Беларусь, Болгар, Бурунди, Грек, Гондурас, Гуам, Гүрж, Казахстан, Канад, Израиль, Ирак, Иран, Латви, Литва, Македони, Молдав, Монгол, ОХУ, ӨАБНУ, Польш, Румын, Серб, Словак, Тайвань, Турк, Узбек, Украин, Унгар, Финланд, ХБНГУ, Хорват, Чех, Швед, Эстони, Япон зэрэг 38 орны өсвөрийн бөхчүүд өрсөлдөж байна.