Боржигоны ноёнд үнэлэгдсэн нь

Сэцэн хан аймгийн Говь мэргэ вангийн хошуу, Сэцэн хан аймгийн Боржигон цэцэн бээлийн хошууд говь, хээр, өвс ургамал юм юмаар зөрүүтэй хол зайтай нутагсан. Хошуудын ихэс дээдэс билгийн сайн өдрүүдэд хүлэг морьдоо сойж наадмын торгон дэнжид хаш хөөрөг зөрүүлэн хааяахан мэнд амараа мэдэлцдэг эртний заншилтай. Мэргэ вангийн хошууны их уяач Хунз хэмээх Ганжуур өнөөдөр өнгөлөх морийг гадарладаг гэхийг олон хошуудаар шуугиад байдаг нь ихэсийн чихэнд содон. Боржигоны тэргүүлэх ноён Цэрэнсандив бодож сууна. Ганжууртан /Говийн уяачдыг хэлнэ/ морины уяагаар явна гэнэ. Ганжуурт нь хөнгөн хазаар, хударга өгөөд хэр мэддэгийг үзье. Түрүүлэх моринд энэ хоёрыг хийчих. Би харж байя, гэх нь зөв гэж бодлоо. Бараа бологчид Боржигоны ноёны үгийг ташааралгүй дамжуулан Ганжуурын гарт хазаар хударгыг хүргэв гэнэ.
Шинжээч Ганжуур ноёны сүйх хөлөглөн олон хошуудаас ирсэн гал уяагаар орж хударгыг нэг буурал моринд хийгээд хазаарыг нь хийлгүй алхаж яваа харагджээ. Морьдын түрүү асар тойрон эргэв. Ганжуур хазаар барьсан хэвээр алхаад байх юм. Морьд гарч байхад зүүн өмнөөс хүүхэдтэй гурван морь хөтөлсөн хүн гарч ирэхэд Ганжуур түүнийг дуудан тосч уулзаад хэдэнтээ тойруулан харснаа толин сартай хүрэн моринд хөнгөн хазаарыг хийгээд явуулахыг Боржигоны хиа нар ажиглаж амжив. Наадамчин олон морь бариа руу хошуурч мөнөөх шинжээчийн мэддэг эсэхийг цэгнэж дүгнэх цаг болжээ.
Тоосны үзүүрт бараан морь айсуй. . .
 Толгойдоо   мөнгөн   хийцтэй   хөнгөн   хазаартай,   толин сартай хүрэн морь түмэн эх болж гоёмсог хударгатай буурал морь дараалав. Наадамчин олон Мэргэ вангийн их шинжээч Ганжуурын эрдэмд бишрэн түүний нэр алдар наадмын  дэвжээнээс Даншиг долоон хошуу Халх даяар салхи мэт улбаалан хүрэв.
Боржигоны ноёд Мэргэ вангийн ноёдод зоог барихдаа "Би танай Ганжуурт түрүүлэх моринд хий гэж хазаар, хударга өгүүлсэн болно. Харин Ганжуур хазаарыг түрүүлэх моринд, хударгыг аман хүзүүний моринд олж хийлээ. Танай хошууны  морины үнэн сайн шинжээчийг би харлаа" гэж согтуу нүдээр ирмэсэн гэдэг. Говь мэргэ вангийн хошуунд морины их мэргэд төрөх хувь заяа оршвой.

Л.Сандуй