​ Бар жилийн унаганууд бүгд айрагдав

Хот хүрээ орж ажил төрөл амжуулаад хул халзангийнхаа удмыг хэлсэн хугацаандаа бичиж амжсангүй ээ. Одоо гялс сийрүүлээдэхье.

Эцгийн тухайд өмнө нь хэлсэн Б.Батхүү Тод манлайн Англи хээр азарга гэж. Харин эх саарал гүү нь анхны их хурд айргийн гуравт хурдалж байсан Сүхбаатар аймгийн Уулбаян сумын харьяат М.Шагдарын хул азарганы төлийн төл юм.

Б.Батхүү Тод манлай М.Шагдар гуайгаас хулынх нь төл хул үрээг авч уян олон бага наадамд түрүүлгэж, айрагдуулжээ. Түүний нэг нь Төмөртэйн уурхайн ой байсан бөгөөд түрүүлэн түмэн эхээр цоллуулсан тул Б.Батхүү уяач азаргаа Төмөртэй хул хэмээн нэрийдэхээр болж.

Төмөртэй хулын төл хул, саарал зүсмийн олон адуу Тод манлайд байх агаад нэг нь Д.Эрдэнэболдод бэлэглэдэг саарал гүү.

Саарал гүүний төл Архангайн наадамд түрүүлж, Их хурдад айрагдсан талаар өмнө нь бичсэн.

Харин одоо өгүүлэх нэг сонирхолтой мэдээлэл бол сүүлийн хоёр жил улс, бүсийн уралдаануудад түрүүлж, айрагдаж буй Б.Батхүү Тод манлайн унаган адуунууд цөм Төмөртэйн хулын төлийн төлүүд. 

Өөрөөр хэлбэл хул азарганы охин төлөөс  гарсан нэг жилийн дөрвөн эр унага дөрвүүл төрийн зарлигт наадамд түрүүлж айрагджээ. Мөн одоо танилцуулах гурван үрээ Педагог дуудлагатай араб халзан азарганых төл гэнэ.

 АХ-ын 103 жилийн ой, Үндэсний их баяр цэнгэл наадмын шүдлэн насанд айргийн тавд хурдалсан Увс аймгийн Зүүнхангай сумын уугуул Цагааны Зулхүүгийн зээрд үрээ Төмөртэй хулын төл хүрэн гүүний унага.

Өнгөрсөн жил Ламын Гэгээний 385 жилийн ой, хангайн бүсийн уралдаанд түрүүлээд, Эрдэнэтэд болсон төвийн бүсийн уралдаанд айргийн гуравт хурдалсан Төв аймгийн Алтанбулаг сумын уугуул Цэрэндоогийн Амарсанаагийн хонгор шүдлэн мөн Төмөртэй хулын төл хонгор гүүний унага.

Өнгөрсөн жил Ламын Гэгээний ойд дөрвөлөөд өнөө жил Увс аймгийн 100 жилийн ой, баруун бүсийн уралдаанд аман хүзүүнд хурдалсан Цагааны Зулхүүгийн бор үрээ Төмөртэй хулын төл бор гүүний унага.  

Ийнхүү монгол төрийн наадам хийгээд шигшмэл морьдын Их хурд уралдаан, улсын бүсийн уралдаануудад түрүүлж, айрагдсан эдгээр үрээнүүд цөм 2022 оны хавар тэнцсэн БАР жилийн унаганууд юм. 

А.Тэлмэн