"ТОД МАГНАЙН ЗОЧИН"-МУ-ЫН АЛДАРТ УЯАЧ Д.БАТЧУЛУУН

"Тод магнай" подкаст 114 дугаарт хүрч жаргаад, Малчин телевизийн "Эрдэмт уяачид, эрэмгий хүлгүүд" цуврал түр завсарласан энэ хэсэгхэн хугацаанд "нэвтрүүлгээ хийхгүй юмуу? дараагийн дугаарт хэн орох вэ? манай аймаг сумын тэр уяачийг оруулаач" гэсэн хүсэлтүүд элбэг ирлээ. Ганц нэг ТВ ч санал тавив.

Ингээд олны хүсэл, өөрийн эрмэлзлээр "Тод магнайн зочин" нэвтрүүлэг хийхээр шийдэн энэ сарын эхээр Эрдэнэт хотыг зорьж, Булган аймгийн Хангал сумын уугуул, Орхон аймгийн Жаргалант сумын харьяат МУ-ын Алдарт уяач Доржийн Батчулуунд очлоо.

Уулзаж ярилцахаар урьдаас төлөвлөн бодсон зочдын минь нэг тул бид төвөггүй ойлголцож, уяа сужгаа бэлтгэн борооноос урьтан хөөрөлдөж амжсан билээ.

Ардын хувьсгал ялснаас хойшхи 100 жилийн хугацаанд Монгол төрийн наадамд Булган нутгийн уяачдаас хоёр хүн их насны морь айрагдуулан ид хавыг гайхуулсан байдаг агаад тэд Хангалын голын Дорж овогт хүүхдүүд байдаг нь сонин. Бид энэ удаа 1994 оны улсын баяр наадамд 14 настай хүлгээ аман хүзүүнд хурдлуулж уугуул нутгийн түмнээ, уясан догдолдог олноо баясгасан Доржийн Батчулууны түүхийг хүргэх болно.

Эрүүл мэндийн шалтгааны улмаас энэ хүртэл өнжсөн нэвтрүүлгээ өнөөдөр үзэгч та бүхэндээ хүргэж байна. Болгоон соёрхоно уу.