Эрдэнэтийн бүсийн уралдааны эрлийз ангилалд түрүүлж айрагдсан хүлгэд

Засгийн газрын тогтоолт хаврын бүсийн хоёр дахь уралдаан гуравдугаар сарын 9-нд Орхон аймагт амжилттай болж өндөрлөлөө. Бүтэц зохион байгуулалтын шинэчлэл хийгээд удаагүй байгаа Орхоны “Эрдэнэт хүлэг” уяачдын холбооны удирдлагууд  өөрийн нутагт зохион байгуулж буй бүсийн уралдаандаа ихээхэн анхаарал хандуулан ажиллажээ. Тэд “Дүнжингаравын хурд-2013” уралдааны зохион байгуулах комиссийн гишүүнээр ажиллан туршлага судлаж, орон нутагтаа хэрэгжүүлсэн нь энэ байлаа. Эрлийз ангиллын морьдын уралдаанаар эхэлсэн тус наадамд эхний 10-т  хурдалсан хурдан хүлгэдийн цувааг сонирхуулахад:
Эрлийз ангилалд- 45
1.Говь-Алтай аймгийн Шарга сумын уугуул, Тод манлай уяач Х.Бат-Эрдэнийн сартай хээр түрүү магнайд хурдаллаа. Хэдхэн хоногийн өмнө болсон “Дүнжингаравын хурд-2013” уралдаанд айргийн дөрөвт хурдалсан Тод манлайн хурдан буян ийнхүү амжилтаа ахиулсан юм. Могой жил гарсаар тун ч одтой наадаж буй хээр үрээ Төв аймгийн Цээл сумын уугуул, МУ-ын Алдарт уяач П.Баяраагийн унаган адуу бөгөөд эх нь Төв аймгийн Алтанбулаг сумын “жаал” хэмээх Шаравын адуу. Харин эцэг нь Англи, Оросын Будённый үүлдрийн азарга байсан тухай бид өмнө нь мэдээлж байсан билээ.  Дааган цагаасаа эхлэн төрийнхөө их баяр наадамд айргийн таваар давхиж, давхар уяагаар Говь-Алтай аймаг үүсгэн байгуулагдсаны 70 жилийн ойд түрүүлсэн хээр үрээ шүдлэндээ төрийн наадмын эрлийз дунд насны ангилалд зургаалж, Сэлэнгэ аймаг үүсгэн байгуулагдсаны 80 жилийн ойд түрүүлээд байгаа юм. Харин хязааландаа “Дүнжингаравын хурд-2012” уралдааны эрлийз ангилалд аман хүзүүдэж, хэдхэн хоногийн дараа болсон “Өмнөговь-2012” хаврын бүсийн уралдаанд хүүхэдгүй долоод давхин, өнгөрсөн зун төрийн болон төвийн бүсийн уралдааны эрлийз дунд насны ангилалд тус тус аман хүзүүнд хурдалсан аргагүй хурдан ажнай билээ.
2. Архангай аймгийн Ихтамир сумын уугуул, “Эрдэнэс МГЛ” ХХК-ийн захирал Г.Тэмүүлэнгийн зээрд халзан аман хүзүүнд хурдаллаа. 2012 онд төвийн бүсийн наадмын эрлийз дээд насны ангилалд айргийн тавд хурдалсан халзан азарга өнгөрсөн оны чансаа өндөр есөн азарганы нэгээр нэрлэгдсэн билээ.
3. Орхон аймгийн Баян-Өндөр сумын уугуул Д.Мөнхтүвшингийн хээр. Шинэ цагийн монгол адууны төлөөлөгчдийн нэг Манлай уяач Б.Билэгдэмбэрэлийн унаган адуу хээр үрээ могой жилийн анхны наадам “Дүнжингаравын хурд-2013” уралдаанд айргийн гуравт хурдалсан бол энэ удаад амжилтаа бататган бүсийн наадмаас хоёр дахь айргаа хүртлээ. 
4. Орхон аймгийн Баян-Өндөр сумын харьяат, “Эрдэнэт хүлэг” холбооны дэд тэргүүн, “Бүтээл” ХХК-ийн захирал, аймгийн Алдарт уяач Баярцогтын хүрэн азарга.
5. Төв аймгийн Сэргэлэн сумын уугуул, аймгийн Алдарт уяач Ч.Ган-Очирын өсгий цагаан хүрэн.
6. Завхан аймгийн Улиастай сумын уугуул,Тод манлай уяач Л.Цандэлэгийн сартай зээрд. Зээрд үрээний эцэг нь Барга халзан азарга байдаг бол эх нь Тод манлайн унаган адуу болох хонгор гүү юм. Зээрд үрээ соёолондоо “Хотгойдын хурд-2010” бүсийн наадамд аман хүзүүдэж  байсан бол, могой жил гарсаар Сэлэнгийн “Буган халиун ажнай” холбооны мялаалга наадамд гурвалж, “Дүнжингаравын хурд-2013” хаврын бүсийн анхны уралдаанд 17-оор давхисан юм.
7. Дундговь аймгийн Луус сумын уугуул С.Шинэбаатарын Одон хээр. Энэ цагийн хурдан буянгуудын нэг Одон хээр үрээний эх нь Төв аймгийн Эрдэнэ сумын уугуул Гэсэрваанийн унаган хүрэн гүү. Харин эцэг  нь аймгийн Алдарт уяач Г.Ариунсайханы Араб хээр азарга юм. С.Шинэбаатар хээр үрээгээ дааганд нь авч тэр жилээ улсын наадамд түрүүлгэн, давхар уяагаар Эрдэнэтэд болсон төвийн бүсийн наадамд түрүүлж, хязааландаа төрийн их наадам болон төвийн бүсийн наадамд тус тус айрагдаж байсан. Одоогоор улс бүсийн наадмаас хоёр түрүү, хоёр айраг хүртээд буй Одон хээр “Дүнжингаравын хурд-2013” уралдаанд 16-аар давхисан бөгөөд уяа сойлгыг нь С.Шинэбаатарын дүү С.Элбэгзаяагийн хамт тааруулдаг аж.
8. Өмнөговь аймгийн Хүрмэн сумын уугуул, УИХ –ын гишүүн асан Х.Бадамсүрэнгийн хул. Алдарт Үүлэн бор азарганых нь төл хул үрээний эх нь Сүхбаатар угшилтай Сайхан хэмээх хул гүү бий. Хул үрээ даагандаа буюу 2010 онд Орхон аймагт болсон төвийн бүсийн уралдаанд айргийн таваар, шүдлэндээ Нийслэлийн тэргүүн магнай хүлэг шалгаруулах уралдаанд хол тасархай түрүүлж, хязааландаа 2012 онд төвийн бүсийн уралдаанд айргийн таваар хурдалж байсан. Харин могой жилийн өнгө тодорхойлох “Дүнжингаравын хурд-2013” уралдаанд долоод давхин, давхар уяагаар ийнхүү Эрдэнэтийн бүсэд наймлажээ. Хул үрээний туурай бага зэргийн зовиуртай байсан нь айрагдах боломжийг хязгаарласан уяачид ярих юм билээ.
9. Төв аймгийн Сэргэлэн сумын уугуул, аймгийн Алдарт уяач Ч.Ган-Очирын хүрэн. Он гарсаар хаврын бүсийн уралдаануудад уясан хүлгэд нь хурдан байгаа Ч.Ган-Очир энэ ангилалд хоёр үрээгээ арвын дотор давхиулж, шинэ цагийн монгол адуугаар одтой наадаж байгаа нэгэн гэдгээ харуулаад авсан. Хүрэн үрээ хэдхэн хоногийн өмнө болсон “Дүнжингаравын хурд-2013” уралдаанд айргийн тавд хурдалсан тухай бид мэдээлж байсан билээ.
10. Төв аймгийн Лүн сумын уугуул, Манлай уяач Б.Билэгдэмбэрэлийн сартай хээр.

А.Мягмарсүрэн